Sansyzbaı Qurbanuly «Atyraý» telearnasyna suhbat berdi (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Atyraý oblysyna bastap kelgen delegatsııa quramyndaǵy Sharıǵat jáne pátýa bóliminiń meńgerýshisi Sansyzbaı Qurbanuly jergilikti «Atyraý» telearnasyna suhbat berdi.
«Iman nury» baǵdarlamasynda qonaq bolǵan Sansyzbaı Qurbanuly qazaq dalasyna ıslam dininiń kelý tarıhy, handyq kezeńdegi ıslamnyń damýy, Qazaqstan musylmandary dinı basqarmasynyń qurylý tarıhy, jalpy, sharıǵı máseleler taqyrybynda nasıhat aıtty.
«Qazaq keshe nemese búgin musylman bolǵan joq. Islam dininiń qazaq dalasyna kelý tarıhy sonaý segizinshi ǵasyrdan bastalady. Keshegi Altyn Orda dáýirinde ıslam dini erekshe qanat jaıdy. Dese de, dinimiz ben dilimiz úshin úlken synaq Keńes Odaǵy kezinde keldi. Álıhan Bókeıhan, Ahmet Baıtursynuly syndy zııalylarymyzdan aıryldyq. Meshitterimiz, qasıetti kitabymyz, talaı tom-tom dinı eńbekter órteldi. Qazirgi ýaqytta Allaǵa shúkir, táýelsizdigimizben birge, dinimiz ben dilimizben qaýyshtyq. Búginde meshitterimizdiń sany 3000-ǵa jýyqtady. Dinı bilikti mamandar sany artty. Endigi mindetimiz — táýelsizdigimizdi tuǵyrly etý, asyl dinimizdi órkendetý jolynda eńbek etý» dep atap ótti suhbat barysynda Sharıǵat jáne pátýa bóliminiń meńgerýshisi Sansyzbaı Shoqanov.
