«SÁDÝAQAS QAJY ǴYLMANI» MEShITINDE «MENIŃ SÚIIKTI PAIǴAMBARYM» BILIM SAIYSY ÓTTI

Astana qalasyndaǵy «Sádýaqas qajy Ǵylmanı» meshitiniń shákirtteri arasyndaǵy «Meniń súıikti Paıǵambarym» bilim saıysy ótti.

Saıys komandalar arasynda ótip,  olar Paıǵambarymyzdyń (Oǵan Allanyń salaýaty men sálemi bolsyn) ómiri men ónegesine qatysty bilimderin ortaǵa saldy. Is-sharanyń negizgi maqsaty da osy, ıaǵnı, shákirtterdiń paıǵambar ómiri men ónegesi týraly bilimderin tereńdetý.

Bilim dodasy úsh kezeń boıynsha ótti. «Mekkelik kezeńde» qatysýshylar Alla Rasýlynyń Mekkedegi ómiri men Islamnyń alǵashqy jyldaryna qatysty suraqtarǵa jaýap berdi. «Hıjret jáne Mádınalyq kezeńde» Mádına dáýirindegi mańyzdy oqıǵalar boıynsha bilimderin kórsetti. Al «Oqıǵany baıanda» kezeńinde berilgen tarıhı oqıǵany júıeli túrde baıandap, sebep-saldary men taǵylymyn jetkizdi.

Shákirtterdiń bilimin ádilqazylar alqasy «Áziret Sultan» meshitiniń naıb ımamy Mahmýd Qasym, «Nursultan» meshitiniń ustazy Ádilhan Orazov, «Áljan ana» meshitiniń naıb ımamy Serikbol Haman saralap, baǵasyn berdi.

Júldeli oryn ıeleri arnaıy dıplom jáne syılyqtarmen marapattaldy. Saıystyń basqa da qatysýshylaryna belsendilik tanytqany úshin yntalandyrý syılyqtary tabystaldy.