Sádýaqas Ǵylmanıdyń qyzy aýyzashar berdi (FOTO)

Qazaqstandaǵy Islam dinniń kórkeıýine ólsheýsiz eńbek sińirgen din qaıretkeri, qazı Sádýaqas qajy Ǵylmanıdyń týǵan qyzy, búginde ǵasyr jasap otyrǵan súıegi asyl ájemiz Úkijan Sádýaqasqyzy Elorda jurtshylyǵyna aýyzashar berdi. El anasynyń kıeli dastarqanyna zııaly qaýym ókilderi men Ǵylmanı áýletiniń týys-jegjattary jınaldy.

Atamysh dastarqan basynda QR UǴA akademıgi, L.Gýmılev atyndaǵy Eýrazııa ulttyq ýnıversıtetiniń áleýmettik-mádenı damý jónindegi prorektory Dıhan Qamzabekuly jáne fılologııa ǵylymdarynyń doktory, professor Serik Negımov qatarly ǵalymdar arnaıy qatysyp, jınalǵan jurtshylyqqa din men ǵylymnyń, dástúr men dinniń sabaqtastyqtary jaıly salıqaly sóz sóıledi.

Dastarhan basynda «Sádýaqas qajy Ǵylmanı» meshitiniń Bas ımamy Nurlan Ramazanov din jolynda eleýli eńbek etken Ǵylmanı rýhyna jáne barsha ómirden ótken din qaıratkerlerine Quran oqyp, duǵa baǵyshtady.

Ótken zamannyń nebir kesapatyn kózimen kórip, qýǵyn-súrgin, ashtyq sekildi zobalańdy basynan ótkergen, kókiregi qazynaǵa toly Úkijan apa jınalǵan jurtshylyqqa analyq aq batasyn berip, kelesi Ramazanǵa aman jetýdi tiledi.