«Rýhanı jeti qazyq» Bas meshit jamaǵatyna tanystyryldy (FOTO)

Keshe respýblıkalyq «Áziret Sultan» meshitinde «Rýhanı qundylyqtar – el birliginiń negizi» atty jamaǵatqa arnalǵan semınar bolyp ótti. Aqsham namazynan keıin meshittiń astyńǵy qabatyna lyq tolǵan jamaǵatqa Bas meshit ımamdary Qazaqstan musylmandarynyń rýhanı tuǵyrnamasy «Jeti rýhanı qazyq» qujatyn tanystyryp, jalpy túsindirme jumystaryn ótkizdi.

Jaqynda ǵana ótken III Imamdar forýmynda qabyldanǵan bul tarıhı qujat jamaǵat boıynda izgi qasıetterdi qalyptastyra otyryp, ulttyq qundylyqtarymyzdy jańǵyrta túsýge baǵyttalǵan. Atalmysh qujatta adam balasynyń kisilik kelbetin, kórkem minezin qalyptastyrýǵa negiz bolatyn jeti qasıet aıryqsha atalady. Dálirek aıtqanda, ımandylyq, otandy súıý, bilim alý, birlikke bolysý, eńbekqorlyq, mádenıettilik jáne ádiletti bolý syndy asyl qasıetterdiń paıdasy men hıkmeti túsindirilip, oqyrmanyn izgilikke úndeıdi. Ár adam balasy óz boıynda osy qasıetterdi qalyptastyra bilse, qoı ústine boztorǵaı jumyrtqalaǵan berekeli qoǵam ornaıtyny sózsiz.

Jeti qasıettiń árqaısysyna jeke-jeke baıandama jasap, nasıhat júrgizgen «Áziret Sultan» meshitiniń qyzmetkerleri atalmysh qujattyń artqan amanaty men kótergen júgi jaıly keńinen qozǵap, jamaǵatty izgilikke úndedi. QMDB tóraǵasynyń birinshi orynbasary, naıb múftı Naýryzbaı qajy Taǵanuly «Jeti rýhanı qazyq» qujaty Qazaqstan halqyna jol siltep, jón kórsetip turatyn shamshyraq ispettes ekenin atap ótti. Sóz sońynda barsha áriptesterin, meshit jamaǵatyn osy qasıetterdi nasıhattaý, ulttyq bolmysymyzǵa sińirý jolynda jumyla jumys isteýge shaqyrdy.

Kesh sońynda meshit basshylyǵynyń uıymdastyrýymen jamaǵatqa arnalyp dastarhan jaıylyp, keleli áńgime jalǵasy as ústinde jalǵasty. Atalmysh taqyryp aıasyndaǵy túrli suraqtar qoıylyp, tushymdy jaýaptarmen almasty.

Sýretterdi «FOTOGALEREIa» aıdarynan kóre alasyzdar!