RAMAZAN – RÝHANI KEMELDENÝ AIY

22 naýryz 2023 1892 0
Оqý rejımi

Naýryzbaı qajy TAǴANULY,

QMDB Tóraǵasy, Bas múftı 

 

Qadirli otandastar!

Sizderdi ısi musylman balasy asyǵa kútetin, on eki aıdyń sultany bolǵan qasıetti Ramazan aıynyń kelýimen shyn júrekten quttyqtaımyn! Ár shańyraqqa birlik pen bereke, baqyt pen shattyq tileımin! Ramazan aıy qutty bolsyn!

Alla Taǵala qasıetti Quranda: «Ýa, ıman keltirgender! Ózderińe deıingi qaýymdarǵa paryz etilgendeı taqýalyqqa jetýleriń úshin senderge de oraza ustaý paryz etildi» («Baqara» súresi, 183-aıat) dep baıandaıdy. Sharıǵatymyz boıynsha balıǵatqa tolǵan, aqyl-esi durys árbir musylmanǵa Ramazan aıynda oraza ustaý – paryz. Alaıda jolaýshylar, naýqas jandar men syrqaty asqynyp ketýinen qaýiptengen adamdar, sondaı-aq júkti nemese emizýli balasy bar áıelder oraza ustaýdy keıinge qaldyrýyna bolady. Buǵan sharıǵatymyz ruqsat beredi.

Ramazan aıynyń qadiri men qasıetin tereń túsingen izgiler orazaǵa alty aı qalǵan sátten bastap: «Rabbymyz, bizdi Ramazan aıyna aman-esen jetkize gór!» – dep duǵa jasaǵan. San ǵasyrdan beri Islam dinin rýhanı tiregi etken halqymyz berekeli Ramazan aıyn erekshe daıyndyqpen kútedi. Saýaptar eselenip jazylatyn aıda aýyzashar berip, kómekke muqtaj jandarǵa pitir sadaqasyn úlestirip, úlkenderdiń alǵysy men batasyn alýǵa tyrysady. Orazada ıgi nıetpen oryndalatyn izgi amaldar búginde salt-dástúrimizge aınalyp, urpaqtan-urpaqqa jalǵasyp keledi.

Ramazan – Alla Taǵalanyń musylmandarǵa bergen uly syıy, nyǵmeti. Qasıeti men sharapaty mol aıda kúnálarymyzdan arylyp, saýap jınaýǵa, jan-dúnıemizdi tazartýǵa tyrysqan abzal. Ardaqty Paıǵambarymyz Muhammed (oǵan Allanyń salaýaty men sálemi bolsyn) óz úmbetin: «Bul aıda jánnat esikteri ashylady. Oraza tutqan adamnyń aldyńǵy jáne keıingi kúnálary keshiriledi», – dep súıinshilegen. 

Ramazanda aýyz bekitken ısi musylman balasy ózin iship-jeýden ǵana shektemeı, jany men tánin jamandyqtan saqtap, izgilikke umtylady. Is-áreketin musylmanǵa tán ádep aıasynda oryndaýǵa tyrysady. Óıtkeni Ramazan – kez kelgen izgi amaldy rııasyz nıetpen jasaýǵa tárbıeleıtin, adamdy taqýalyqqa úıretetin aı.

Rýhanı kemeldený aıy – Ramazanda barynsha ádepsiz áreket pen qate-kemshilikten arylýdy kózdegen adam ádep bilmes jandardyń dóreki áreketterin keshirip, sypaıy túrde «men orazamyn» dep keshirim jolyn ustanady. Kisiniń kemshiligine sabyr etý de – úlken saýap. Alla Taǵala «Shýra» súresiniń 43-aıatynda: «Árıne kim sabyr etip, keshirimdi bolsa, daý joq, isterdiń eń mańyzdysy osy», – degen. 

Ashtyq pen shólge tózip, Alla razylyǵyn alýdy shynaıy nıet etken adamǵa beriletin syı men qurmet erekshe bolmaq. Alla Taǵala qudsı hadıste«Aýzy berik adam iship-jeýin Men úshin doǵardy. Oraza – Men jáne qulymnyń arasyndaǵy ǵıbadat. Oǵan beriletin syıdy Men ǵana ólshep, Men beremin. Aýzy berik qulymnyń ashtyq pen shóldeý sebebinen shyqqan aýyz ıisi Men úshin mısk átirinen de qaıyrly», – degen.

Ramazan – Rabbymyzdyń meıirim-mahabbatyna bólenetin aı. Berekeli, saýaby mol aıda Allanyń meıirimine bólenip, árbir izgi amalymyzdyń jaqsylyǵy eselenip jazylǵaı! Elimiz aman, jerimiz tynysh, táýelsizdigimiz baıandy bolǵaı! Jaratýshy Jabbar Iemiz keler jylǵy oraza aıyna aman-esen jetýimizdi násip etkeı! Ámın!

Источник: Aidos

Pіkіrler Kіrý