Naýryzbaı qajy Taǵanuly: Ramazan aıy múbárak bolsyn! (VIDEO)

Asa qamqor, erekshe meıirimdi Allanyń atymen bastaımyn!

Adamzat balasyn týra jolǵa bastaýshy Quran kárimniń alǵashqy qutty aıattary túse bastaǵan qasıetti Ramazan aıy da kelip jetti. Barshamyz asyǵa kútken Ramazan – ıgilik pen bereke, keshirim jáne meıirim hám qaıyrymdylyq aıy. Ol jaıynda «Baqara» súresiniń 185-aıatynda: «Ramazan – adamdarǵa týra jol nusqaýshy, aq pen qarany aıyrýshy, bekem tutynatyn jolbasshy retinde Quran túsirile bastaǵan aı. Ramazan aıy týǵanyn kórgen adam birden oraza ustasyn. Eger bireýler aýrý bolyp, áıtpese jol saparda júrse, onda basqa kúnderde ótesin», – dep jazylǵan.

Ramazan aıynda oraza ustaǵan baýyrlarymyzdyń ulyq ǵıbadattary arqyly óz pendeshiligin sezinip, musylmanǵa tán sabyr men tózimdiliktiń shynaıy úlgisin kórsetedi. Ózara suhbattar, taraýıh namazdary, kúndizgi qulshylyqtar musylman qaýymyn biriktirip, jańa rýhanı jetistikterge bastaıdy. Ásirese, aýyzashar dastarhandary erekshe áleýmettik jáne rýhanı baıyta túsetin zor mánge ıe. Ramazan aıynda múmkindigi bar musylmandar muqtaj jandarǵa qaraılasyp, kómek berýdiń, qaıyrymdylyq pen baýyrmaldyqtyń úzdik úlgisin kórsetedi.

Súıikti paıǵambarymyzdyń (s.ǵ.s.) hadıs-sháripinde: «Ramazan aıy jánnattyń esikteri aıqara ashylǵan, jáhannam esikteri tars jabylǵan, azǵyn shaıtandar shynjyrmen kisendelgen múbarák aı», – dep pash etilgen. 

Qurmetti, musylman baýyrlar! Alla Taǵala barshamyzdyń osy aıda jasaıtyn ǵıbadat-qulshylyqtarymyzdy qabyl etkeı! Múbarák Ramazan barshańyzǵa qutty, kúlli Islam álemine qaıyrly da berekeli bolǵaı!

Aılardyń sultany qasıetti Ramazan aıy múbarák bolsyn! Ony ózine laıyqty qulshylyqpen tıisinshe joǵary deńgeıde ótkizý arqyly Alla Taǵalanyń rahymy men meıirimine bólenip, mol saýap alýdy barshamyzǵa násip etkeı! Áýmın!