RAMAZAN AIYNYŃ EKINShI ON KÚNI QORYTYNDYLANDY
Qazaqstan musylmandary dinı basqarmasynyń uıymdastyrýymen qasıetti Ramazan aıynyń ekinshi on kúninde 800 myńnan astam adamǵa aýyzashar berildi.
Aýyzashar dastarqandary Astana, Almaty men Shymkent qalalary, sondaı-aq oblys ortalyqtary men aýdan, aýyl-aımaqtarda ornalasqan 1062 meshitte jaıylýda. Rýhanı sharaǵa meshit jamaǵatynan bólek medrese shákirtteri, stýdent jastar, balalar men múgedekter úıinen kelgen jandar, sonymen qatar kópbalaly ata-analar, jalpy kómekke muqtaj azamattar qatysýda.
Sondaı-aq elimizdiń 565 meshitinde 637 qarı kúndelikti taraýyq namazynda Quran Kárimdi hatym etýde. Aıta keteıik, qazirgi tańda elimizde 2854 meshit jumys istep tur. Sonyń 565-inde taraýyq namazynda Quran Hatym jasalýda. Ekinshi on kúnde óńirlerdegi barlyq meshitter boıynsha 1420 ret Quran hatym oqylyp, duǵasy jasaldy.
Budan bólek, Aqparat bóliminiń uıymdastyrýymen Ramazan aıyna arnalǵan tikeleı Efırde ýaǵyz-nasıhat kórermen nazaryna usynylýda. Búginge deıin QMDB ustazdarynyń qatysýymen ótken 4 baǵdarlama «Munara TV» arnasy men «Mýftııat QMDB» YouTube-arnasynan tikeleı Efırde kórsetildi.
Kúndelikti taraýyq namazynan buryn «Quran aıattarynyń hıkmeti» taqyrybynda jamaǵatqa ýaǵyz aıtylýda. Al QMDB «Zeket jáne qaıyrymdylyq» qorynyń «El úlesi – páterge» jobasy boıynsha 2 din qyzmetkerine jáne 8 kópbalaly otbasyǵa, barlyǵy 10 baspananyń kilti tabystaldy. Respýblıkamyz boıynsha «Ramazan qorjyny» qaıyrymdylyq aktsııasy aıasynda 29 377 kópbalaly, erekshe bala tárbıelep otyrǵan otbasylarǵa da tabystaldy. «Ramazan táttisi» jobasy aıasynda balaǵa táttiler men oıynshyqtar taratylyp keledi.
