Qurbandyq qoıynyń jasyna qatysty málimdeme

Osydan birer kún buryn Nur-Sultan qalasynda «Qurban shalý rásimin uıymdastyrý sharalary» atty baspasóz brıfıngi bolyp ótken edi. Brıfıng barysynda Nur-Sultan qalasynyń bas ımamy Erbolat Júsipovke qurban2020.kz saıtynda Elorda boıynsha qoı túliginiń baǵasy nelikten 50 myń teńge dep bekitilgeni jaıly saýal qoıylǵan bolatyn. Elorda bas ımamy bul suraqqa jaýap bere kele: «Malǵa qoıylatyn talaptar bar. Nur-Sultan qalasy boıynsha qoıdyń baǵasy 50 myń, iri qarany 350 myń dep berdik. Bul jerde qoıdyń jasyna nazar aýdarý kerek. 6 aıǵa jetpegen, aryqtaý toqtylardyń ózin 35-40 myńǵa alýlaryńyz múmkin. Biraq qoı men eshki 1 jasar bolýy kerek. Al, 1 jasar qoıdyń baǵasy úshin 50 myń óte jaqsy baǵa», – dep atap ótti.

Keıinnen áleýmettik jeli betterinde jáne keıbir portal jýrnalısteri bul áńgimeni ilip áketip, túsinikti tilde aıtylǵan sózdiń astaryn aınaldyryp, «Arzan qoıdy Qudaı da qabyldamaıtyn bolǵany ma?», «Qurbandyqqa bir jasar qoı ǵana jaraıdy degen talap oryndy ma?!» degen syndy alypqashpa jańalyq ta jarııalap kep jiberdi. Osyǵan oraı, brıfıngte aıtylǵan málimdemeni taǵy bir márte tarqatyp aıtýdy jón sanap otyrmyz.

Erbolat Júsipov óz sózinde Elorda bazarlaryndaǵy mal baǵasynyń habardar ekenin ańǵartyp, 35-40 myń teńgege jasy alty aıǵa jetpegen, aryqtaý toqty ǵana satyp ala alýǵa bolatynyn eskertip, kórermenderge sharıǵat talaby boıynsha qurbandyqqa shalynatyn qoı men eshki túliginiń bir jasqa jetken bolý kerektigin eske saldy. Osy sebepti de, Nur-Sultan qalasynyń bas ımamy: «Bir jasqa tolmaǵan qoılar qurbandyqtyń ornyna júrmeı qalýy múmkin» dep, bazardaǵy aryq toqtylardyń sharıǵat talabyna saı kelmeıtinin aıtyp saqtandyrǵan bolatyn.

Bul – Erbolat Júsipovtiń nemese basqa bir din qyzmetkeriniń oıdan shyǵarǵan úkimi emes. Islam sharıǵatynyń talaby osy. Qoı men eshki bir jasqa jetý kerek. Úlkendigi bir jasar qoıǵa uqsas alty aıǵa tolǵan semiz ári iri qoıdy da qurbandyqqa shalýǵa ruqsat etiledi. Al, iri qara eki jasqa, túıe bes jasqa tolýy shart[1].

Minekeı, osy aıtylǵan pátýaǵa oraı, Erbolat Júsipov dál qazirgi Elorda bazarlaryndaǵy mal baǵasyn saraptaı kele, 35-40 myń teńgege alty aıǵa tolmaǵan, aryq toqty ǵana keletinin eskertti. Ol toqtylardyń qurbandyq ornyna júrmeı qalýy múmkin ekenin aıtty. Sondaı-aq, bul baǵa tek Elorda turǵyndary úshin ekenin eskerte keteıik, qurban2020.kz saıtynda elimizdiń ár óńirlerindegi mal baǵasy da ártúrli kórsetilgen. Osy rette taǵy bir aıta keter jaıt, bıylǵy karantın rejımine sáıkes QMDB «Zeket» qorynyń uıymdastyrýymen júzege asyp otyrǵan «Ókildik (onlaın) qurban shalý» jobasy aıasynda QMDB mal baǵasyn retteýge aralaspaıdy. Mal baǵasy jergilikti naryq baǵasymen kórsetilgen. Sondaı-aq, tapsyrys berýshiden túsken qarajat mal ıesine, ıaǵnı satýshyǵa tikeleı beriledi. Óıtkeni bul deldaldyq qyzmet emes. Kórsetilgen somaǵa qasapshynyń qyzmeti ǵana kiredi. Al qurbandyq etin bólshektep, muqtaj jandarǵa taratý syndy barlyq uıymdastyrý jumystary meshit jamaǵaty men eriktilerdiń kómegi arqyly tegin júzege asady. Bul qurban shalýǵa tapsyrys berýshi azamattar úshin úlken jeńildik.

Sóz sońynda aıtarymyz, qasıetti Qurban aıt merekesi qarsańynda halyqty áýre-sarsańǵa túsirip, qyzyl sózdi qubylta berý qısynsyz áreket. Saıt betinde qyzdy-qyzdymen asyl dinimizge til tıgizip, sharıǵatty mansuqtaǵan pikirlerge de oryn berilipti. Bilmestikpen aıtqan bir bólek, degenmen Islamǵa til tıgizip, orynsyz pikir aıtýdyń da aýyrlyǵy baryn bile júrgenimiz jón.

Alla Taǵala barshamyzǵa sabyrlyq berip, ulyq merekeni laıyqty dárejesinde ótkerýge jazǵaı! Tilegen duǵa-tilekterimiz, shalǵan qurbandyqtarymyz qabyl bolǵaı!