QURBAN AIT QUTTY BOLSYN!
Naýryzbaı qajy TAǴANULY,
Qazaqstan musylmandary dinı
basqarmasynyń tóraǵasy, Bas múftı
QURBAN AIT QUTTY BOLSYN!
Asa qamqor erekshe meıirimdi Allanyń atymen bastaımyn! Barlyq maqtaý Allaǵa tán. Ardaqty Paıǵambarymyz Muhammedke Allanyń salaýaty men sálemi bolsyn!
Qurmetti otandastar! Qadirli jamaǵat!
Sizderdi asyl dinimizdegi ulyq meıram – Qurban aıt merekesimen shyn júrekten quttyqtaımyn. Aıt qabyl bolsyn! Barshańyzǵa mol baqyt, myqty densaýlyq, otbasylaryńyzǵa amandyq pen jumystaryńyzǵa bereke tileımin.
Qurban aıt namazynan keıin úsh kún ishinde jaǵdaıy kelgen musylmanǵa qurbandyq shalý – mindet. Alla Taǵala qasıetti Quranda: «Rabbyńnyń razylyǵy úshin namaz oqy jáne qurbandyq shal» («Káýsar» súresi, 2-aıat) dep buıyrǵan.
Baǵzy zamannan beri Islam dinin rýhanı tiregine aınaldyrǵan halqymyz Qurban aıtty aıryqsha daıyndyqpen qarsy alǵan. Maldyń eń úlkenin ári jaqsysyn qurbandyqqa shalyp, qurbandyq etin kómekke muqtaj jandarǵa taratý, qonaq kútip, úlkenniń batasyn alý, syılyq-káde berý, renjitken jandy keshirý, otbasyn qýanyshqa keneltý syndy amaldar – dástúrimizde qalyptasqan izgi qundylyqtar.
Qurban aıt – ısi musylman balasynyń eń ulyq merekeleriniń biri. Óıtkeni ol – shynaıy nıet pen Allaǵa degen súıispenshilikti pash etetin meıram. Ulyq merekeniń tárbıelik máni men maǵynasy tereńde jatyr. Ibrahım paıǵambardan (oǵan Allanyń sálemi bolsyn) bastaý alatyn bul mereke Allanyń ámirine sháksiz moıynsunýdyń naǵyz kórkem úlgisin pash etedi.
Allaǵa degen shynaıy adaldyq pen moıynsunýǵa tárbıeleıtin bul meıram musylman balasyn taqýalyqqa jeteleıdi. Bul týraly qasıetti Quranda: «Umytpańdar, olardyń eti de, qany da eshqashan Allaǵa jetpeıdi. Oǵan jetetin nárse – júrekterińizge uıalaǵan taqýalyqtaryń (shynaıy nıetteriń)» («Haj» súresi, 37-aıat), – delingen. Aıatta aıtylǵandaı, Qudaı jolynda jaqsylyq jasaýǵa nıettengen pende bul amaldy rııasyz oımen oryndaıdy.
Qurban aıt – Jaratqanǵa jaqyndaýdyń, taqýalyq pen jan tazalyǵyn arttyrýdyń, muqtajǵa qol ushyn sozyp, saýapqa kenelýdiń merekesi. Aıt kúnderi adamdar bir-birine keshirimmen qarap, baýyrmaldyq pen janashyrlyqtyń, tatýlyq pen birliktiń kórkem úlgisin kórsetedi. Osyǵan oraı Qazaqstan musylmandary dinı basqarmasy Qurban aıt kúnderi «Aıt – tatýlyq merekesi» tatýlasý aktsııasyn uıymdastyrady. Mundaǵy maqsatymyz – arazdasqan aǵaıyndy, bir-birimen renjisken jandardy tatýlastyrý. Sondyqtan mol saýap jazylatyn qasıetti kúnderde bir-birimizdi keshirip, keńshilik jolyn ustanaıyq, aǵaıyn!
Alla qalasa, aıt kúnderi «Qurban aıt – ulyq mereke» taqyrybynda respýblıkalyq deńgeıde ıgi is-sharalar uıymdastyrylady. Oblystyq, qalalyq jáne aýdandyq meshitterdiń aýlasynda kıiz úıler tigilip, ulttyq sport túrlerinen arnaıy saıystar uıymdastyrylady. Jer-jerde mádenı-rýhanı keshter ótkiziledi. Osy rette elimizdegi barsha jamaǵatty ulttyq kıimderimizdi kıip, aıt merekesin dástúrimizge saı ulttyq naqyshtarmen ótkizýge, ıgi bastamalarymyzǵa belsendi túrde atsalysýǵa shaqyramyn.
Qurban aıt tek dinı mereke ǵana emes, qoǵamdaǵy birlik pen tatýlyqty nyǵaıtatyn, qaıyrymdylyqty pash etetin rýhanı meıram. Osy oraıda elimizdegi barsha kásipker azamattardy Qurban aıtta mal qunyn qoldan kótermeı, halyqtyń áleýmettik jaǵdaıyn eskerip, ońtaıly baǵa usynýǵa, jurtymyz kúnde tutynatyn azyq-túlikke múmkindiginshe jeńildik jasaýǵa úndeımin.
Ardaqty aǵaıyn!
Ózderińiz bilesizder, Qurban aıtty atap ótýdiń negizgi maqsaty – musylmandar arasynda ózara meıirimdilik, jomarttyq, qaıyrymdylyq, qanaǵat syndy adamgershilik qundylyqtardy qalyptastyrý. Qazaqstan musylmandary dinı basqarmasy birneshe jyldan beri halyqqa qolaıly ári ashyq qyzmet kórsetý maqsatynda elimiz boıynsha qurban.muftyat.kz onlaın qurbandyq platformasyn júzege asyryp keledi.
Bul joba QMDB bastamasymen 2020 jyldan beri turaqty túrde jumys istep, jyl saıyn tehnıkalyq turǵyda jańartylyp, jetildirilýde. Onlaın qurbandyq jobasynyń negizgi maqsaty – azamattarǵa qurban shalý rásimin zamanaýı tsıfrlyq formatta ońaı ári senimdi túrde oryndaýǵa múmkindik berý, sondaı-aq muqtaj otbasylarǵa kómek kórsetýdi júıeli uıymdastyrý. Igi bastama aıasynda Qazaqstan musylmandary dinı basqarmasy Qurban aıt kúni respýblıka deńgeıinde qaıyrymdylyq is-sharalardy júzege asyrady. Barsha halyqty saýapty iske úles qosýǵa úndeımin. Allanyń raqym nury tógiletin berekeli sátterde halqymyzǵa jaqsylyq jasap, kópshiliktiń rızashylyǵyna bóleneıik.
Qasıetti aıt kúnderi ár shańyraqqa bereke, ár otbasyǵa amandyq tileımin. Alla Taǵala shalǵan qurbandyqtaryńyzdy, jasaǵan duǵa-tilekterińiz ben ıgi amaldaryńyzdy qabyl etsin!
Elimiz aman, jurtymyz tynysh, táýelsizdigimiz tuǵyrly bolǵaı! Jaratqan Iemiz halqymyzǵa baq-bereke, mol rızyq, yntymaq pen tatýlyq násip etsin! Qurban aıt merekesi qutty bolsyn!
