Qurban aıt merekesine oraı baspasóz konferentsııasy ótti (FOTO)

Musylman qaýymynyń ulyq meıramy – Qurban aıt merekesine oraı búgin Nur-Sultan qalasy ákimdiginiń baspasóz ortalyǵynda konferentsııa bolyp ótti. Baspasóz máslıhatyna QMDB tóraǵasynyń birinshi orynbasary, naıb múftı Naýryzbaı qajy Taǵanuly, Nur-Sultan qalasynyń Qalalyq orta sapasy jáne baqylaý basqarmasynyń Veterınarııa jáne ósimdikterdi qorǵaý bóliminiń basshysy Áshim Haırýllın, Taýarlar men kórsetiletin qyzmetter sapasy men qaýipsizdigin baqylaý basqarmasy basshysynyń mindetin atqarýshy Gaýhar Shapataeva jáne Nur-Sultan ákimdigi Qoǵamdyq damý basqarmasynyń bas mamany Ádilet Tóleýtaıuly qatysyp, qajetti aqparattarmen bólisti.

Baspasóz máslıhaty barysynda el astanasyndaǵy aıtýly merekege daıyndyq barysy, jumys jospary tanystyrylyp, Qazaqstan musylmandary dinı basqarmasy men Nur-Sultan ákimdiginiń jaýapty tulǵalary tilshiler qaýymynyń suraqtaryna jaýap berdi.

Aıta keteıik, bıylǵy Qurban aıt merekesi tamyz aıynyń 11-juldyzynda bastalatyn bolmaq. Osy kúni tań azanymen minájat etýmen bastalatyn mereke úsh kún boıy qazaq dalasynda ózine jarasymdy sán-saltanatymen ımandylyq dýmanyna jalǵasady. Qasıetti merekege oraı QMDB bastamasymen ótkizilip kele jatqan «Rabbyń úshin qurban shal!» aktsııasy bıyl da elimizdiń túkpir-túkpirinde uıymdastyrylyp, qurbandyq etteri muqtaj jandarǵa taratylatyn bolmaq. Osy oraıda atalmysh sharaǵa daıyndyq barysy aıtylyp, naıb múftı Naýryzbaı qajy Taǵanuly Nur-Sultan qalasynda bolatyn birqatar sharalar jaıynda tanystyrdy.