Qurban aıt: merekede jamaǵat meshitke ulttyq kıimmen keldi

Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń bastamasyna sáıkes bıylǵy Qurban aıt merekesinde jamaǵattyń meshitke ulttyq kıimmen kelýine erekshe mán berildi.

Atalǵan ıgi bastama Astana qalasy ókildigine qarasty meshitterde de keńinen qoldaý taýyp, aıt namazyna jınalǵan jamaǵat qazaqy naqyshtaǵy ulttyq kıimderimen keldi. Bul kórinis merekeniń ajaryn ashyp qana qoımaı, halqymyzdyń mádenı murasy men salt-dástúrine degen qurmettiń jarqyn úlgisine aınaldy.

Islam dini men qazaq halqynyń dástúri ǵasyrlar boıy sabaqtasyp, bir-birin tolyqtyryp keledi. Sondyqtan ulttyq kıimmen meshitke kelý – tek syrtqy sán-saltanat emes, ata-baba amanatyna adaldyqtyń, ulttyq bolmysty qadirleýdiń jáne rýhanı qundylyqtardy ulyqtaýdyń belgisi.

Qurban aıt – musylmandardy meıirimge, tatýlyqqa jáne baýyrmaldyqqa úndeıtin ulyq mereke. Osyndaı ıgi kúnderi ulttyq kıim kııý arqyly jamaǵat merekelik kóńil kúıdi sezinip qana qoımaı, óskeleń urpaqqa qazaqy qundylyqtardy dáripteýdiń ónegesin kórsetti.

Источник: Aisha