QURBAN AIT-2024: QASAPShYLARǴA ARNALǴAN SEMINAR ÓTTI
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń tapsyrmasymen qasıetti Qurban aıt meıramyna oraı «Halal Damý» standarttaý jáne sertıfıkattaý mekemesiniń uıymdastyrýymen «Qasapshylyq – saýapty hám jaýapty is» taqyrybynda onlaın-oflaın semınar ótti.
Semınarǵa Ýaǵyz-nasıhat bóliminiń meńgerýshisi, ǵulamalar keńesiniń hatshysy Batyrjan Berdenuly, «Halal Damý» dırektory Aıbek Asqarbekuly, sharıǵat jáne pátýa bóliminiń mamany Baýyrjan Ábdýáli, veterınarlyq sanıtarııa isiniń mamany Danııar Baqzeıneluly jáne jergilikti baqylaýshylar men tehnologtar, óńirlik qasaphana qyzmetkerleri qatysty.
Bólim meńgerýshisi Batyrjan Berdenuly qasapshylyqtyń mańyzdy is ekenin atap ótip: «Alla Taǵala Quranda: «Senderge: ólekse, aqqan qan, dońyz eti jáne Alladan basqanyń atymen baýyzdalǵan mal haram qylyndy. Jáne býynyp, urylyp, qulap, súzilip ólgen maldar jáne jyrtqysh jegen mal haram…» Bulardyń bárin jeýge bolmaıdy, «… biraq (jany shyqpaı) baýyzdalǵandardan basqa» degen. Paıǵambarymyz (oǵan Allanyń salaýaty men sálemi bolsyn): «Alla Taǵala barlyq nárseni jaqsylap isteýdi buıyrdy, sondyqtan maldy soısańdar, durystap soıyńdar», – dep aıtqan. Sondyqtan qurban shalýdyń ádebin, sharttaryn bilip alý kerek» dedi
Aıbek Asqarbekuly barlyq óńirde qurbandyq shalatyn arnaıy oryndar ázirlenip, árbir qasaphanada sertıfıkattalǵan qasapshylar qyzmet atqaratynyn jetkizdi. Jáne de sharıǵat normalaryn saqtap, halal standartqa saı mal soıý – úlken jaýapkershilik ekenin atap ótti.
Sonymen qatar, Baýyrjan Ábdýáli men Danııar Baqzeıneluly qurban shalýdyń sharıǵı úkimderi men talap-sharttaryn keńinen túsindirip, halal standartqa saı mal baýyzdaý jáne et óńdeý sharttaryn baıandady. Semınar sońynda qatysýshylar tarapynan qoıylǵan suraqtarǵa jaýap berildi.
