«Qorqyt atanyń danalyq sózderi» atty kitap úsh tilde jaryq kórdi

Qyzylorda oblysynda «Qorqyt atanyń danalyq sózderi» atty kitap oqyrman qaýymǵa jol tartty. Bul týyndy qazaq, orys jáne aǵylshyn tilderinde jaryq kórgen. Atalmysh ıgilikti is Tuńǵysh Prezıdent – Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda qolǵa alynǵan. Kitap Qyzylorda oblystyq «Rýhanı jańǵyrý» ortalyǵynyń uıymdastyrýymen júzege asyryldy. Ony ortalyq qyzmetkeri, belgili túrkitanýshy, fılologııa ǵylymdarynyń kandıdaty Serikbaı Qosan qurastyryp shyqty. Kitap úsh myń taralymmen oqyrman qolyna jol tartty.

Joba avtory qazaq tilindegi nusqasy professor B.Ysqaqovtyń aýdarmasy negizinde ázirlengenin aıtady. Oǵan azdaǵan túzetýler engizilgen. Al orys tilindegi mátinine 1965 jyly «Knıga moego deda Korkýta» degen ataýmen jaryq kórgen akademık V.V.Bartoldtiń aýdarmasy negiz bolǵan. Aǵylshyn tilindegi nusqasy Ulttyq aýdarma bıýrosy mamandarynyń kómegimen daıyndalǵan.

Ǵalymnyń aıtýynsha, kitap mátini Bilim jáne ǵylym mınıstrligi Ǵylym komıteti Ortalyq ǵylymı kitaphanasynyń sırek qory men M.Áýezov atyndaǵy Ádebıet jáne óner ınstıtýtynyń qoljazba qorynda saqtalǵan materıaldar negizinde jáne 1999 jyly jaryq kórgen «Qorqyt ata Entsıklopedııasynda» jaryq kórgen nusqalar negizinde daıyndalǵan.

Oblystyq «Rýhanı jańǵyrý» ortalyǵy jyl sońyna deıin aımaqtaǵy sakraldy muralar jaıly kitap pen Syr súleıi Turmaǵambettiń buryn esh jerde jarııalanbaǵan jyrlarynan jınaq shyǵarýdy josparlap otyr.