QMDB janynan «Dinı ońaltý» bólimi ashyldy (FOTO)
Bas múftı Naýryzbaı qajy Taǵanulynyń buıryǵymen Qazaqstan musylmandary dinı basqarmasy janynan «Dinı ońaltý» bólimi ashyldy.
Elordada ótken alqaly jıynda QMDB Tóraǵasy Naýryzbaı qajy Taǵanuly atalǵan bólim meńgerýshisi Qanat Alshynbaevty ujymǵa tanystyryp, jańa jumysyna bereke tiledi.
«Dinı basqarmanyń negizgi jumys baǵyttarynyń biri – destrýktıvti dinı aǵymnyń arbaýynda ketken azamattardy ońaltý, olarǵa dinı keńes berip, túsindirme, nasıhat jumystaryn júrgizý. Osy baǵyttaǵy jumysymyzdy jandandyrý maqsatynda «Dinı ońaltý» bólimin ashtyq. Osyǵan deıin oblys ortalyqtary men respýblıkalyq mańyzy bar qalalarda ımamdyq qyzmet atqarǵan, Respýblıkalyq aqparattyq-nasıhat tobynyń belsendi múshesi retinde ónimdi eńbek nátıjesin kórsetken, bir kezderi «Nasıhat» keńes berý-ońaltý ortalyǵy» qoǵamdyq birlestiginiń dırektory bolǵan tájirıbeli din qyzmetkeri Qanat Alshynbaev jańadan ashylǵan bólim jumysyna serpin beredi degen senimdemin», – dep atap ótti Bas múftı Naýryzbaı qajy Taǵanuly.
Qanat Muqanǵalıuly Alshynbaev 1978 jyly Soltústik Qazaqstan oblysynda týǵan.
2001-2005 jyldary «Nur Múbárak» ýnıversıtetinde bilim alǵan;
2010-2013 jyldary Kókshetaý qalasyndaǵy «Naýan haziret» meshitinde naıb ımam qyzmetin atqarǵan;
2013-2017 jyldary Kókshetaý qalasynda «Nasıhat» keńes berý-ońaltý ortalyǵy» qoǵamdyq birlestiginiń dırektory qyzmetin atqarǵan;
2017-2019 jyldary Kókshetaý qalasyndaǵy «Naýan haziret» meshitine naıb ımam qyzmetine qaıta taǵaıyndalǵan;
2019 jyly Nur-Sultan qalasyndaǵy «Aq meshit» meshitiniń naıb ımamy qyzmetine taǵaıyndaldy;
2019 jyldyń mamyrynda Nur-Sultan qalasyndaǵy «Sádýaqas qajy Ǵylmanı» meshitiniń naıb ımamy qyzmetin atqardy;
2020 jyldyń naýryz aıynan bastap Bas múftı Naýryzbaı qajy Taǵanulynyń buıryǵymen QMDB «Dinı ońaltý» bóliminiń meńgerýshisi bolyp taǵaıyndaldy.
Otbasyly. Bes balasy bar. Budan bólek tórt jetim balany óz qamqorlyǵyna alǵan.
