QMDB JANYNAN «AÝDARMAShYLAR ALQASY» QURYLDY
Búgin Qazaqstan musylmandary dinı basqarmasy janynan «Aýdarmashylar alqasy» quryldy.
QMDB Tóraǵasy, Bas múftı Naýryzbaı qajy Taǵanuly tóraǵalyq etken jıynǵa elimizge belgili aýdarmashy ǵalymdar men ıslamtanýshy mamandar qatysty.
Qadirmendi Memleket basshysy Qasym-Jomart Toqaev óz sózinde: Halqymyzdyń dúnıetanymyna saı dástúrli ıslamdy dáripteý asa mańyzdy. Onyń ǵylymı-teorııalyq negizin damytý qajet. Óskeleń urpaqtyń rýhanı tárbıesin nazardan tys qaldyrýǵa bolmaıdy degen bolatyn.
Osy maqsatta qurylyp otyrǵan aýdarmashylar alqasy dástúrli dinimizdi nasıhattaý, dinı-aǵartýshylyq baǵyttaǵy aýdarma jumystaryn jetildirý, qazaq tilindegi sapaly dinı ádebıetter qoryn kóbeıtý jáne oqyrmanǵa mazmuny tereń, senimdi eńbekter usynýǵa baǵyttalǵan.
Sondaı-aq, jıyn barysynda Bas múftı Naýryzbaı qajy Taǵanuly:
«Qazirgi tańda rýhanı baı muramyzdy júıeleý, ony qoǵamǵa túsinikti ári senimdi túrde jetkizý – asa mańyzdy mindetterdiń birine aınalyp otyr. Ásirese, jahandaný dáýirinde san túrli aqparat kózderi kóbeıgen ýaqytta, halqymyzǵa asyl dinimizdiń shynaıy mazmunyn durys ári dál jetkizý – úlken jaýapkershilik.
Klassıkalyq eńbekterdi qazaq tiline aýdarý arqyly dástúrli ıslam ilimin burmalanýdan saqtap, durys túsinikti qalyptastyramyz», – dep atap ótti.
