QMDB: Ýaǵyz-nasıhattyń sapasy men saýattylyǵy sóz boldy (FOTO+VIDEO)

Elordada QMDB-nyń Bas keńsesinde Respýblıkalyq aqparattyq nasıhat tobynyń jalpy jınalysy ótti. Jıynǵa Bas múftı Serikbaı qajy Oraz, Birinshi naıb múftı Naýryzbaı qajy Taǵanuly, Apparat basshysy Ǵylymbek Májıev, Qoǵamdyq kelisim komıtetiniń ókili Nurǵalı Qabylov, QMDB bólim basshylary men RANT músheleri qatysty.

Jıyn barysynda RANT-qa úmitker din qyzmetkerleri test tapsyryp, emtıhan suraqtaryna jaýap berdi. Onyń ishinde dinı saýaldardan bólek, tarıh, ádebıet pen mádenıetke baǵyttalǵan suraqtar boldy. Sondaı-aq RANT-qa endi múshe bop kirgender aýyzsha emtıhannan ótti. QMDB tóraǵasy, Bas múftı Serikbaı qajy Oraz bul test óz kezeginde eldegi ımamdardyń biliktiligin jetildirip, jan-jaqty bolýǵa yqpal etetinin atap ótti.

«Bul, birinshiden, eldiń aldyna shyǵatyn azamattardyń deńgeıin ósiredi. Elimizde din salasynda myqty mamandar jeterlik. Jyl saıyn «Nur-Múbárak» ýnıversıtetin kóptegen túlekter bitirip, dıplom alýda. Shetelden dinı kadr aldyrýǵa muqtaj emespiz», – dep atap ótti Serikbaı Satybaldyuly.

Kezdesý barysynda RANT jumysy, ýaǵyz-nasıhattyń sapasy men saýattylyǵy jan-jaqty talqylanyp, atqarylǵan is-sharalar esebi pysyqtaldy. RANT quramyna qabyldanǵan din qyzmetkerlerine arnaıy kýálik tabystaldy.