QMDB: Tótenshe jaǵdaı jarııalanǵan kezde meshitte juma jáne bes ýaqyt namaz oqýǵa qatysty pátýa
Asa qamqor, erekshe meıirimdi Allanyń atymen bastaımyn.
Barsha madaq álemderdiń Rabbysy Allaǵa tán. Adamzattyń asyly Muhammedke onyń otbasy men barsha sahabalaryna salaýat pen sálem bolǵaı!
Búginde COVID-19 koronavırýs juqpaly derti álem jurtshylyǵyn alańdatyp otyr. Dúnıejúzilik densaýlyq saqtaý uıymynyń álemdi sharpyǵan juqpaly dertti pandemııa dep jarııalaýyna baılanysty Qazaqstan Respýblıkasynyń barlyq aýmaǵynda 2020 jyldyń 16 naýryzynan bastap 30 táýlikke tótenshe jaǵdaı engizildi.
Alla Taǵala adamzat balasyna:
وَلَا تُلْقُوا بِأَيْدِيكُمْ إِلَى التَّهْلُكَةِ
«Óz-ózderińdi qaýip-qaterge tikpeńder», – dep eskertý jasaǵan («Baqara» súresi, 195-aıat). Ómir – Alla Taǵalanyń bergen amanaty.
Paıǵambarymyz (oǵan Allanyń salaýaty men sálemi bolsyn) juqpaly aýrýǵa baılanysty: «Naýqas kisi deni saý adamǵa jaqyndamaýy tıis», – degen (Býharı, Mýslım).
Munymen qosa sharıǵatta «Ózine de, ózgege de zııan keltirýge bolmaıdy» degen qaǵıda bar.
Islam dini keıbir ǵıbadattardy qaýipti jaǵdaılarda ýaqytsha toqtatýǵa ruqsat beredi. Mysaly, adamnyń ómirine, densaýlyǵyna, mal-múlkine, bala-shaǵasy men otbasy múshelerine áldebir zalal tıetin bolsa, sharıǵatymyz onyń meshitke kelip, bes ýaqyt namazdy jamaǵatpen oqýyn, tipti juma namazǵa qatysýyn mindettemeıdi.
Osy rette Qazaqstan musylmandary dinı basqarmasynyń Ǵulamalar keńesi elimizde jarııalanǵan tótenshe jaǵdaıdy eskere kele, koronavırýstyń jamaǵat arasynda taralýynyń aldyn alý sharasyna qatysty tómendegini málimdeıdi:
Birinshiden, memleket tarapynan elde tótenshe jaǵdaı jarııalanýyna jáne indettiń taralý qaýpi joǵary bolýyna baılanysty meshitterde juma namazy ýaqytsha oqylmaıdy. Árkim óz úıinde juma namazdyń ornyna besin namazyn óteıdi.
Ekinshiden, meshitter jabylmaıdy, bes ýaqyt namazǵa azan shaqyrylady, alaıda bes ýaqyt namaz meshitte jamaǵatpen oqylmaıdy.
Úshinshiden, meshit janyndaǵy ashanalarda ótetin qudaıy as, sadaqalar (jetisi, qyrqy, jyly t.b. dástúrli kádeler) ýaqytsha toqtatylady.
Tórtinshiden, janaza namazyn tek jaqyn týystarymen, ıaǵnı az toppen ótkizgen durys.
Qazaqstan musylmandary dinı basqarmasy musylman qaýymyn sabyr saqtaýǵa, orynsyz úreılenbeýge, halyqty dúrliktirmeýge jáne Alla Taǵalaǵa duǵa etýge shaqyrady.
16 naýryz 2020 jyl
Nur-Sultan qalasy
