QMDB tóraǵasy Túrkııa elshisimen suhbattasty (FOTO)

Búgin Qazaqstan musylmandary dinı basqarmasynda Bas múftı Naýryzbaı qajy Taǵanuly Túrkııa Respýblıkasynyń elimizdegi Tótenshe jáne Ókiletti Elshisi Ýfýk Ekıdjı myrzamen kezdesti.

Eki jaqty resmı kezdesýde baýyrlas elderdiń baılanysy sóz boldy. Sonymen qatar, taraptar Qazaqstan musylmandary dinı basqarmasy men Túrkııa din isteri basqarmasy arasynda qabyldanǵan eki jaqty memorandým aıasynda júzege asyp jatqan jobalar týraly áńgimelesti.

Bas múftı Naýryzbaı qajy Taǵanuly QMDB-nyń ıgi bastamalaryna qoldaý kórsetip kele jatqan Túrkııa din isteri basqarmasyna alǵysyn aıta kele: «Qazaq pen túrik – túbi bir, dini bir eń jaqyn baýyrlas el. Búginde eki el arasyndaǵy baılanys kún sanap artýda. Bul rette Elbasy Nursultan Nazarbaevtyń eńbegin erekshe atap ótý kerek. Prezıdentimiz Qasym-Jomart Toqaev sol sabaqtastyqty ary qaraı jalǵastyrýda. Qazaqstannyń táýelsizdigin moıyndaǵan eń alǵashqy memleket – Túrkııa. Bul – túrik halqynyń qazaq ultyna degen meımandostyǵy men janashyrlyǵyn dáleldeıtin tarıhı oqıǵa», – dedi.

Óz kezeginde Ókiletti Elshi Ýfýk Ekıdjı QMDB men Túrkııa din isteri basqarmasy arasyndaǵy áriptestik baılanysty arttyra túsýge nıetti ekenin jetkizdi.