QMDB tóraǵasy Reseı Altaı respýblıkasynyń múftıimen kezdesti (FOTO)

Elordada Qazaqstan musylmandary dinı basqarmasynyń tóraǵasy Serikbaı qajy Oraz Reseı Altaı Respýblıkasynyń múftıi Janbolat Oqtaýbaevpen kezdesti.

Kezdesýge QMDB Apparat basshysy Ǵylymbek Májıev, Protokol jáne halyqaralyq qatynastar bóliminiń meńgerýshisi Ershat Ońǵarov, baspasóz hatshysy Aǵabek Qonarbaıuly qatysty.

Basqosýda Qazaqstan jáne Altaı Respýblıkasy dinı basqarmalary arasyndaǵy áriptestik baılanys aıasyn keńeıtý máseleleri sóz boldy. Sonymen qatar, ekijaqty qabyldanǵan memorandým boıynsha eki tarapqa qoıylǵan mindettemelerdi júzege asyrý barysy talqylandy.

Múftı Janbolat Oqtaýbaev QMDB Tóraǵasy Serikbaı qajy Orazǵa Altaı Respýblıkasyndaǵy qandastar men din qyzmetkerleriniń duǵaı sálemin jetkize kele, árqashan rýhanı qoldaý kórsetip otyratyn Qazaqstan múftııatyna alǵysy men jyly lebizin bildirdi.

Kezdesý sońynda taraptar dinı tereń máseleler boıynsha ortaq pátýa qabyldaýǵa ýaǵdalasty.

Aıta ketsek, Qazaqstan musylmandary dinı basqarmasy Altaı Respýblıkasyndaǵy qandastar men din qyzmetkerleriniń ótinishi boıynsha olardy qajetti dinı kitaptarmen, shapanmen qamtamasyz etip keledi.