QMDB TÓRAǴASY RANT MÚShELERINIŃ ONLAIN JINALYSYN ÓTKIZDI
Búgin Astanada Qazaqstan musylmandary dinı basqarmasynyń tóraǵasy Naýryzbaı qajy Taǵanuly múftııat janyndaǵy Respýblıkalyq aqparattyq-nasıhat top (RANT) músheleriniń onlaın jınalysyn ótkizdi.
Jınalysqa QMDB basshylyq quramy, bólim meńgerýshileri jáne RANT músheleri onlaın rejımde qatysty. Jıynda sóz alǵan Bas múftı Naýryzbaı qajy Taǵanuly: «Ózderińiz bilesizder, Alla Taǵala Quranda «Álı Imran» súresiniń 104-aıatynda: «Senderdiń aralaryńda jaqsylyqqa shaqyryp, jamandyqtan tosatyn bir top bolsyn. Mine solar qutylýshylar», – dep aıtqan. Alla Taǵala bizge dinı qyzmet atqarý sharapatymen qatar asyl dinimizdiń nasıhatshysy bolý nyǵmetin násip etti. Bul nyǵmettiń shúkirligi – jumystyń amanatyn sezinip, bar yqylasymyzben qyzmet atqarý arqyly óteledi. Allaǵa shúkir, búginde RANT jumysy joǵary deńgeıde jumys jasap keledi. Ózderińizge málim, Respýblıkalyq aqparattyq-nasıhat tobynyń maqsaty – dástúrli dinimiz Islamnyń qundylyqtaryn dáripteý, halyqtyń dinı saýatyn arttyrý, el arasynda destrýktıvti, jat aǵymdardyń taralýynyń aldyn alyp, aqparattandyrý, otansúıgishtikti, toleranttylyqty, tózimdilik pen baısaldylyqty nasıhattaý. Biz osy baǵyttaǵy jumystarymyzdy únemi jetildirip, sapaly ýaǵyz aıtýǵa nazar aýdarýymyz qajet», – dedi.
Basqosýda QMDB Ýaǵyz-nasıhat bóliminiń meńgerýshisi Batyrjan Mansurov aqparattyq-nasıhat tobynyń 2024 jyly atqarǵan jumystary jaıly esep berdi. Onyń aıtýynsha, ýaǵyzshylar óńirlerde 52 ret juma ýaǵyzyn aıtyp, oǵan 119 549 adam qatysqan. Budan bólek RANT músheleri 139 ret jamaǵatpen kezdesý ótkizgen. Oǵan qatysqan adam sany – 26 517. Joǵary oqý oryndarynda ótken 55 kezdesýge 10 myńnan astam stýdent qatysqan. RANT músheleri jyl basynan 396 is-shara atqaryp, oǵan 211 951 adam qatysqan.
