QMDB tóraǵasy Qordaı qarılar daıyndaý ortalyǵynda boldy (FOTO)
Jambyl oblysyndaǵy dinı ahýal men dúngen aýyldarynyń qazirgi hálin bilýge arnaıy kelgen Bas múftı Naýryzbaı qajy Taǵanuly Qordaı qarılar daıyndaý ortalyǵynyń jaı-kúıimen tanysty.
Bas múftımen birge osy saparda QMDB Apparat basshysy Ǵylymbek Jádigeruly, Nasıhat jáne qoǵammen baılanys bóliminiń meńgerýshisi Batyrjan Mansurov, Dinı bilim jáne kadr daıarlaý bóliminiń meńgerýshisi Beıbit Myrzageldıev jáne Jambyl oblysynyń bas ımamy Qanat Jumaǵul boldy.
Beıbit Myrzageldıev Bas múftıge qarılar daıyndaý ortalyǵynyń búgingi tynysy týraly baıandady. Kitaphanadan bastap ortalyqty tolyq aralaǵan QMDB Tóraǵasy ár shákirtpen jeke-jeke sóılesti. Sondaı-aq ustazdarmen arnaıy jınalys ótkizdi.
Shaǵyn quramda ótken jıynda kóptegen oılar ortaǵa salyndy. Sonyń ishinde aldaǵy ýaqytta shákirtterdiń ilimin kóterý maqsatynda elimizge belgili ımamdardy, RANT múshelerin sabaq berýge shaqyrý jaıly usynys aıtyldy. Bul usynysqa Bas múftı qoldaý bildirdi.
«Qoǵam kún saıyn ózgerýde. Búgin alǵan bilimińdi erteń jańartýǵa týra keledi. Sondyqtan shákirtterge qoıylar talapty kúsheıtý qajet. Eger alǵan bilimi paıdasyz bolsa, ózine zııan. Sondyqtan bolashaq qarılarymyzdyń sanasy sergek, oıy ushqyr bolsyn» deı kele Naýryzbaı qajy Taǵanuly ortalyq ustazdaryna dinı ǵana emes, qoǵam talabyna saı zaıyrly bilim berýdi de jetildire túsý kerektigin eskertti.
Aıta keteıik, Qordaı qarılar daıyndaý ortalyǵy 2018 jyly ashylǵan bolatyn.
