QMDB Tóraǵasy Ózbekstan múftıimen ortaq jobalardy talqylady (FOTO)
Alǵashqy sheteldik saparyn Ózbekstannan bastaǵan Bas múftı Naýryzbaı qajy Taǵanuly Samarqan qalasynda Ózbekstan musylmandary dinı basqarmasynyń tóraǵasy Ýsmonhon Temırhon ýǵlı Samarqandıımen kezdesti.
Resmı basqosýǵa qazaqstandyq delegatsııa tarapynan QMDB Apparat basshysy Ǵylymbek Májıev, Sharıǵat jáne pátýa bóliminiń meńgerýshisi Sansyzbaı Shoqanov, Dinı bilim jáne kadr daıarlaý bóliminiń meńgerýshisi Beıbit Myrzageldıev, Aqparat jáne qoǵammen baılanys bóliminiń meńgerýshisi Marat Bektazınov qatysty.
Ekijaqty resmı kezdesýde jahandyq syn-qaterge jaýap berýde musylman úmbetiniń ózara yntymaǵyn arttyrý, dinı merekelerdi bir kúnde atap ótý, ortaq pátýalar qabyldaý, destrýktıvti dinı aǵymdardyń teris úgit-nasıhat jumystaryna jol bermeý, baýyrlas elderdiń din qyzmetkerleriniń bilimin arttyrý, tájirıbe almasý sharalaryn uıymdastyrý, Matýrıdı senim mektebi men Ábý Hanıfa mázhabyn halyqqa nasıhattaý, dinı oqý-aǵartý salasy boıynsha birlesken jobalardy júzege asyrý, t.b. máseleler talqylandy.
Bas múftıdi jańa qyzmetimen quttyqtaǵan Ýsmonhon Temırhon ýǵlı Samarqandıı: «Siz bizdiń elimizdegi ımam Buharı atyndaǵy Islam ınstıtýtynda tálim alyp, tájirıbe jınaqtadyńyz. Sizdiń Bas múftı laýazymyna saılanýyńyz bizdi de úlken qýanyshqa bóledi. Úlken amanatty abyroımen atqara berýińizge tilektestigimdi bildiremin. Endigi maqsat – izgi isterde bir-birimizge kómekshi bolý, álemdik syn-qaterge birge jaýap berý. Osy jolda ortaq jobalarymyzdy júzege asyramyz degen senimdemin», – dedi.
Naýryzbaı qajy Taǵanuly óz sózinde Ýsmonhon qajy Alımovke alǵysy men iltıpatyn bildirip, baýyrlas elderdi biriktiretin qundylyqtardy atap ótti.
«Qazaq-ózbek – baǵzy zamannan baýyrlas el. Bizdiń halqymyzda: «Kórshini Qudaı qosady, dosty tańdaısyń», – degen sóz bar. Ózbekstan – Qudaı qosqan kórshimiz. Bizdiń dinı mektebimiz ben mázhabymyz bir. Allaǵa shúkir, búginde eki el arasyndaǵy baılanys kún sanap artyp keledi. Baýyrlastyq baılanysqa din qyzmetkerleri de úles qosýda. Rasynda, halyqqa qyzmet etýden artyq ǵazız nárse joq. Halyqtyń alǵysyn alǵan adam Allanyń razylyǵyna bólenedi. Biz el ıgiligi úshin qyzmet etýge, ortaq maqsattardy júzege asyrýǵa árqashan daıynbyz» dedi Bas múftı Naýryzbaı qajy Taǵanuly.
Kezdesý sońynda taraptar Qazaqstan jáne Ózbekstan musylmandary dinı basqarmalary arasyndaǵy áriptestik baılanysty arttyrýǵa ýaǵdalasty.
