QMDB TÓRAǴASY NIý-IORK QALASYNDAǴY QAZAQSTANNYŃ BAS KONSÝLYMEN KEZDESTI

Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly Amerıka Qurama Shtattaryna jasaǵan jumys sapary aıasynda Nıý-Iork qalasyndaǵy Qazaqstan Respýblıkasynyń Bas konsýly Raýan Manatulymen ekijaqty kezdesý ótkizdi.

Kezdesý barysynda Bas múftı sapardy uıymdastyrýǵa qoldaý kórsetkeni úshin alǵys bildirip, rýhanı-mádenı dıplomatııanyń mańyzyn atap ótti. «Qazirgi jahandaný jaǵdaıynda memleketterdiń ózara qarym-qatynasy tek saıası jáne Ekonomıkalyq baılanystarmen shektelmeı, rýhanı-mádenı dıplomatııa arqyly da tereńdeı túsýde. Elimiz dúnıejúzi deńgeıinde Álemdik jáne dástúrli dinder kóshbasshylary sezin turaqty túrde ótkizip, búkil adamzatty dinı tatýlyq pen ortaq maqsatqa úndep keledi», – dedi Bas múftı.

Sonymen qatar sapardyń mánine toqtalyp, «Bul is-sapar Qazaqstannyń dinı saıasatyndaǵy baıypty baǵytty, dástúrli ıslam qundylyqtaryn jáne tolerantty ustanymdy halyqaralyq deńgeıde tanystyrýǵa baǵyttalǵan. Qazaqstan musylmandary dinı basqarmasy halqymyz ǵasyrlar boıy ustanyp kele jatqan hanafı mázhaby men matýrıdı senim mektebin jan-jaqty dáripteý jumysyn jalǵastyryp keledi», – dedi Naýryzbaı qajy Taǵanuly.

Kezdesý barysynda sheteldegi otandastarmen rýhanı baılanysty nyǵaıtý máselesi de qozǵaldy. «Bul sapar AQSh-ta turatyn otandastarmen rýhanı baılanysty kúsheıtýge oń yqpal etedi. Elshilik pen QMDB arasyndaǵy ózara úılesimdi jumys sheteldegi qazaqstandyqtardyń dinı saýattylyǵyn arttyrýǵa, ulttyq jáne rýhanı bolmysty saqtaýǵa yqpal etedi dep esepteımin», – dedi Bas múftı.

Sóz sońynda Bas múftı Raýan Manatulyna Nıý-Iork qalasyndaǵy qyzmetine tabys tilep, qoldaý kórsetkeni úshin alǵys bildirdi.

​

Источник: Aisha