QMDB tóraǵasy Myrzataı Joldasbekovpen suhbattasty (FOTO)

Búgin Elordada Bas múftı Naýryzbaı qajy Taǵanuly kórnekti memleket jáne qoǵam qaıratkeri, belgili túrkolog- ǵalym Myrzataı Joldasbekovpen suhbattasty.

Kezdesýde múftııat janynan Aqsaqaldar keńesin qurý, jastardy dástúrli qundylyqtarǵa tárbıeleý, Abaıdyń 175 jyldyq mereıtoıy aıasynda birlesken sharalardy júzege asyrý, ımamdardyń bilimi men tájirıbesin arttyrý syndy birqatar máseleler talqylandy.

Bas múftıdi jańa qyzmetimen quttyqtaǵan Myrzataı Joldasbekov: «Alla árqashan abyroıyńdy arttyryp, mereıińdi ústem etsin. Jańa qyzmetińde jaqsylyqtarǵa jete ber. Elimizdiń eńsesi bıik bolǵaı. Din qyzmetinde júrgen ujymyńa, barsha ımamǵa Allanyń bereketin tileımin. Bilimdi bolyńdar. Sol bilimdi halyqqa jaıyńdar. Halyq aman, jurt tynysh bolsyn» degen júrekjardy lebizin jetkizdi.

Abyz aqsaqalǵa alǵysyn bildirgen Bas múftı Naýryzbaı qajy Taǵanuly QMDB janynan Aqsaqaldar keńesi ashylatynyn tilge tıek etti.

«Siz ómirde kórgenińiz ben túıgenińiz kóp qazynaly tulǵalardyń birisiz. Biz sizdiń keńesińizdi tyńdap, ony dinı salada júzege asyrýǵa árqashan daıynbyz. Din qyzmetkerlerine ǵıbratty dáris oqyp berseńiz degen tilegimiz bar. Sonymen qatar, QMDB Aqsaqaldar keńesi jumysyna belsene aralasyp, aqsaqaldyq aqylyńyz ben keńesińizdi aıtyp otyrsańyz. Alla sizge de kúsh-qýat bersin!» dedi Bas múftı Naýryzbaı qajy Taǵanuly.

Kezdesý sońynda ǵalym óziniń «Kisilik kelbeti», «Oıtolǵaý», «Uly dala ádebıeti» syndy 30-ǵa jýyq kitabyn Bas múftıge syıǵa tartty. Óz kezeginde QMDB Tóraǵasy da aqsaqalǵa káde-syı usyndy.