QMDB Tóraǵasy muqtaj otbasyna baspana kiltin tabys etti (FOTO)
«El úlesi – páterge» jobasy aıasynda 283-shi baspana eki birdeı balasy sal aýrýyna shaldyqqan jalǵyz basty ana Tańsamal Haıyrovaǵa buıyrdy.
«Alla Taǵala musylmannyń musylmanǵa qamqor bolýyn buıyrǵan. Qazaqstan musylmandary dinı basqarmasynyń negizgi baǵytynyń biri de qaıyrymdylyq. Osy rette, múftııatqa qarasty «Zeket» qory arqyly 283-shi baspana eki birdeı naýqas balany jalǵyz tárbıelep otyrǵan batyr anaǵa buıyryp otyr. Shańyraǵyńyz shattyqqa tolsyn. Qýanyshyńyzǵa ortaqpyz» dedi Bas múftı.
Aıta ketken jón, Tańsamal Haıyrova 2013 jyldan beri páter jaldap, baspana azabyn tartyp keledi. Úı kiltin alyp turyp kózine jas alǵan ana:
«Alla Taǵala sizderge razy bolǵaı. Eki balamen júrip, úıden úıge kóshý ońaı emes. Biz úshin bul ómirimizdegi eń erekshe, umytylmas sát» dedi baspana baqyty buıyrǵan Tańsamal Haıyrova.
Jylyoı aýdanyna qarasty Qulsary qalasynan tapsyrylyp otyrǵan eki bólmeli páterde barlyq jaǵdaı jasalǵan. Saltanatty shara sońynda Bas múftı qaıyrymdylyqqa atsalysqan azamattarǵa alǵysyn bildirdi.
