QMDB Tóraǵasy: Múftııattyń Sall ortalyǵyn ashý qajet (FOTO)

Elordada Bas múftı Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń Ortalyq apparat jınalysynda múftııattyń Call Ortalyǵyn ashý týraly másele talqylandy.

Osyndaı bastama kótergen Bas múftı Naýryzbaı qajy Taǵanuly: «Búginde QMDB shyǵarǵan pátýalar men bekitken qujattar qoǵamda mańyzdy rólge aınalýda. «Buǵan múftııat qandaı pátýa berer eken?» degen pikirler jıi aıtylady. Dinı basqarmanyń qoǵam aldyndaǵy bedeli men jaýapkershiligin eskerip, múftııat janynan Call Ortalyq ashýymyz kerek. Bul bastama halyq pen Dinı basqarma arasynda altyn kópir bola alady», – dep atap ótti.

Aıta ketsek, QMDB Ortalyq apparat jınalysynda sharıǵat jáne pátýa máselesine qatysty jamaǵat tarapynan jıi qoıylatyn suraqtardyń jaýaby toptastyrylǵan kitap shyǵarý, RANT jáne JANT múshelerine oqý-ádistemelik qural daıyndaý, juma ýaǵyzy kitabyn ázirleý, jastarǵa, qyz-kelinshekterge tanymdyq eńbekter ázirleý, ımamdardyń biliktiligin arttyrý maqsatynda arnaıy bilim saıysyn ótkizý, meshit janyndaǵy saýat ashý kýrsynyń oqý baǵdarlamasyn jetildirý, t.b. máseleler talqylandy. 

Májiliske QMDB Tóraǵasy orynbasary Ershat Aǵybaıuly, QMDB Apparat basshysy Ǵylymbek Májıev, sonymen qatar bólim meńgerýshileri men mamandar qatysty.