QMDB tóraǵasy múftııattyń medıa salasyn damytýdy tapsyrdy (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly múftııattyń aqparat, medıa salasyna jaýapty qyzmetkerlerimen kezdesti.

Kezdesýge QMDB Apparat basshysy Ǵylymbek Májıev, Aqparat jáne qoǵammen baılanys bóliminiń meńgerýshisi Marat Bektazınov, Baspa jáne aýdarma bóliminiń meńgerýshisi Murat Manapuly, QMDB baspasóz hatshysy Aǵabek Qonarbaıuly, «Munara» gazetiniń bas redaktory Serikbol Hasan, «Hıkmet» teleradıostýdııasynyń redaktory Erbolat Aıtbaıuly, jýrnalıst Erkin Shákiruly t.b. mamandar qatysty.

Bas múftı jýyrda QMDB janynan Aqparat jáne qoǵammen baılanys bólimi ashylǵanyn, bul sheshim osy saladaǵy jumystardy jańa deńgeıge kóteretinin atap ótti.

«Qazir aqparat salasy jedel damyp, qoǵamdyq pikir qalyptastyrýda. Biz, din qyzmetkerleri, zamana úrdisinen shet qalmaýymyz qajet. Allaǵa shúkir, saıtymyz, gazet-jýrnalymyz, teleradıostýdııamyz bar. Osy medıa resýrstardyń áleýetin barynsha tıimdi paıdalanýymyz kerek. Barshańyz ortaq maqsatqa jumylyp, jaqsy jumys nátıjesin kórsetińizder», – dedi Naýryzbaı qajy Taǵanuly.

Kezdesýde QMDB Apparat basshysy Ǵylymbek Májıev Bas múftıge aqparat salasyndaǵy birqatar bastamalar men jobalar jaıly baıandady. Basqosý sońynda aqparat, medıa salasynyń mamandaryna naqty tapsyrmalar berildi.

​