QMDB TÓRAǴASY ǴYLYM ORDASYNDAǴY MURAJAIMEN TANYSTY
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almaty qalasyna jasaǵan issapary aıasynda Ǵylym ordasynda ornalasqan murajaı qorlarymen tanysty.
Ǵylym ordasynda ıslam mádenıetiniń qundy muralary saqtalǵan arnaıy kórme uıymdastyrylǵan. Kórmede arab, túrik, tatar, shaǵataı, parsy jáne ózbek tilderinde jazylǵan sırek qoljazbalar qoıylǵan. Murajaı qyzmetkerleri jádigerlerdiń tarıhy men mańyzy jóninde keńinen málimet berdi.
Bas múftı Ǵylym ordasynyń quramyndaǵy Tabıǵat mýzeıi men Arheologııa murajaıyn, sondaı-aq sırek kezdesetin kitaptar mýzeıi men Qazaqstan ǵylymynyń tarıhy murajaıyn aralap kórdi.
Atalǵan mekemede mýzeı jádigerleri men kollektsııalaryn saqtaý, zertteý jáne kópshilikke tanystyrý, ǵylymı-tarıhı jáne mádenı murany nasıhattaý, ǵylymı-zertteý jáne mádenı-aǵartý jumystaryn júzege asyrý baǵytynda júıeli jumystar júrgizilýde.
Kezdesý barysynda Bas múftı kóne muralardy saqtap, keler urpaqqa jetkizý jolynda eńbek etip júrgen murajaı qyzmetkerlerine alǵysyn bildirip, jumystaryna tabys pen bereke tiledi.Sonymen qatar Naýryzbaı qajy Taǵanuly Qazaqstan aýmaǵyndaǵy arheologııalyq qazba jumystary barysynda tabylǵan kóne dáýir jádigerlerin saqtap, zertteýmen aınalysatyn Arheologııa murajaıyn da tamashalady.
Murajaı qorynda qazaq jerin mekendegen ejelgi taıpalar men halyqtardyń mádenı damý deńgeıin, olardyń álemdik órkenıet qazynasyna qosqan úlesin aıǵaqtaıtyn kóptegen qundy eskertkishter saqtalǵan.
Ekspozıtsııalar tórt iri bólimnen turady. Olar: alǵashqy qaýymdyq qoǵam jáne onyń ydyraýy kezeńi, Andron mádenıeti, Beǵazy-Dándibaı mádenıeti, erte temir dáýiri (b.z.b. VIII ǵasyr – b.z. V ǵasyr), sondaı-aq orta ǵasyrlar kezeńiniń eskertkishteri.
Munda ortaǵasyrlyq Taraz, Almaly, Talǵar, Aqtóbe jáne Baba ata qalalarynda júrgizilgen arheologııalyq zertteýler kezinde tabylǵan qysh ydystar, shyny jáne mys buıymdar, sondaı-aq qoldanbaly óner týyndylary kópshilik nazaryna usynylǵan.
