QMDB tóraǵasy: El men jerdiń tynyshtyǵy barshamyzǵa amanat
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly azamattarǵa jalǵan aqparatqa aldanyp, sezimge berilip, bireýge qııanat jasap qoıý úlken kúná ekenin esten shyǵarmaýǵa shaqyrdy.
«Rabbymyz qasıetti Quranda bir adam habar ákelse, onyń baıybyna barmaı amal etpeýdi buıyrady. Biz osydan musylman balasynyń máseleniń anyq-qanyǵyn bilmesten, daýǵa aralasyp, óz baýyryna zarar tıgizýi durys emes ekenin túsinemiz» — deıdi Bas múftı.
Qazaqstan musylmandary dinı basqarmasynyń tóraǵasy jekelegen adamnyń ózara kelispeýshiligi qoǵamdyq deńgeıdegi máselege aınalyp ketpeýi kerek ekendigin aıtty.
«Ardaqty paıǵambarymyz Muhammed (oǵan Allanyń salaýaty men sálemi bolsyn) musylman úmbeti jaqsy ister úshin ǵana jınalatynyn ósıet etken. Sharıǵatymyz adamdar arasyna arazdyq týdyratyn kez kelgen áreketke qatań tyıym salady. Bul zańǵa da qaıshy. Paıǵambar jolyn ustanǵan musylman mundaı amalǵa áste barmaıtyny belgili. Baıqamastan ózge baýyrymyzǵa qııanat jasap qoıýdan saq bolǵanymyz qaıyrly. Alaýyzdyqtan abaı bolǵanymyz abzal. Qoǵamdaǵy tynyshtyq árqaısymyzdyń otbasymyz úshin asa mańyzdy qundylyq ekeni málim. Óıtkeni el men jerimizdiń tynyshtyǵy barshamyzǵa amanat», — dedi Naýryzbaı qajy Taǵanuly.
