QMDB tóraǵasy: Dinge betburys – qalypty qubylys

Qazaqstan musylmandary dinı basqarmasynyń tóraǵasy Serikbaı qajy Oraz balalar men jasóspirimderdiń respýblıkalyq «Aq jelken» jýrnalyna bergen suhbatynda qoǵamnyń dinge betburysy jaıly pikirimen bólisti.

«Islam – memlekettiń rýhanı tiregi. Óıtkeni dinsiz qoǵam bolmaıdy. Al dinge betburys – qalypty qubylys. Adamdar Alla tyıym salǵan dúnıelerden tyıylsa, kerisinshe jaqsy emes pe? Bizdiń dinimizde adamdy májbúrleý joq. Ony Alla Taǵala Quranda, paıǵambarymyz Muhammed (oǵan Allanyń salaýaty men sálemi bolsyn) óz hadısinde aıtqan. Paıǵambarymyzdyń zamanynda ol ómir súrgen qalada basqa dindegiler de tirshilik etken. Sonda paıǵambarymyz, qazirgi tilmen aıtqanda, toleranttylyq tanytty. Musylmandar basym dep, olardy kóshirip jibergen joq, ne bolmasa «báriń musylman bolasyńdar» demedi», – dep atap ótti Bas múftı Serikbaı qajy Satybaldyuly.