QMDB tóraǵasy, Bas múftıdiń musylman qaýymyna úndeýi (VIDEO)
Qadirli baýyrlar!
Adam atadan taraǵan kúlli adamzat balasy jaratylǵan sátten bastap túrli jaqsylyqtar men synaqtardy bastan keshýde. Óıtkeni, ómir – synaq mekeni. Al musylmannyń muraty – synaqty saýapqa aınaldyratyn amal jasaý.
Iman shartyn júregine bekitken múmin jaqsylyq pen jamandyq – Alladan dep qabyldaıdy. Nyǵmetke kenelse – shúkir etedi, qıyndyqqa tap bolsa – tózimdilik tanytady.
Biz – tarıhymyzdyń san qıly syndarly sátterinde úmitsizdikke berilmeı, bir Alladan medet tilegen halyqpyz.
Endeshe, musylman qaýymyn qulshylyq kezinde elimiz ben jerimizdiń, kúlli adamzattyń amandyǵy úshin duǵa jasaýǵa shaqyramyn.
Qurmetti jamaǵat!
Ardaqty paıǵambarymyz aldyn ala keletin túrli dertten saqtaný úshin uıqyǵa jatar kezde «Yqylas», «Falaq», «Nas» súrelerin oqyp, alaqanyna úrlep, denesin súrtken. Duǵa – musylmannyń qorǵany. «Duǵa – ǵıbadattyń máni» (hadıs). Alla Taǵala «Múmın» súresiniń 60-aıatynda: «Menen surańdar. Tilekterińdi qabyldaımyn», – dep ýáde etken.
Jaratqanǵa jalbarynyp, duǵa jasap, ımanymyzdy kúsheıtip, qate-kemshilikten arylýǵa tyrysaıyq.
Biz «Jaqsy sóz – jarym yrys» degen ataly sózdiń qadirin bilip, jaqsylyqqa umtylǵan ultpyz.
Syndarly sátte bir-birimizge jaqsy sóz aıtyp, kómekke muqtaj otbasylarǵa qaıyrymdylyq jasap, mol saýap alýǵa asyǵaıyq!
Tazalyq pen ımandylyq – egiz uǵym. Eń bastysy juqpaly indettiń aldyn alý úshin tazalyq sharalaryna asa mán berýimiz kerek.
«Jeti rýhanı qazyq» qujatymyzda baýyrmaldyq, adaldyq, adamgershilik, birlik, izgilik syndy qoǵamǵa qajet qundylyqtardy aıryqsha atap óttik. Osynaý ıgi bastamany amalǵa asyryp, izgi isterde bir-birimizge kómekshi bolýǵa úndeımin.
Qurmetti otandastar!
Biz talaı zulmatty zamandy bastan keship, ósip-óngen elmiz. Qıyndyqty sabyrǵa jeńdirgen adam Allanyń razylyǵy men raqymyna ıe bolady. «Rasynda, Alla sabyr etýshilermen birge». Rabbymyz «Baqara» súresiniń 153-aıatynda quldaryn osylaı súıinshileıdi.
Ýaqytsha synaqty áýeli Allanyń járdemimen, ımanymyz ben birligimizdiń arqasynda jeńip shyǵatynymyzǵa kóbirek úmit artaıyq.
Alla Taǵala Otanymyzdy, kúlli adamzat balasyn juqpaly indetten aman etip, óz panasynda saqtaǵaı. Barshańyzǵa Allanyń amandyǵy men bereketin tileımin.
