QMDB TÓRAǴASY «ÁZIRET SULTAN» MEShITINDE JUMA ÝAǴYZYN AITTY (FOTO)
![](/img/news/4818a594774c9ed21e2652d2928a5edb.0.jpg)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Astana qalasyndaǵy «Áziret Sultan» meshitinde juma ýaǵyzyn aıtty.
«Áleýmettik jelini qoldanýdyń ádebi men mádenıeti» taqyrybynda ýaǵyz aıtqan Bas múftı: «Qazirgi kúni áleýmettik jeliler kún saıyn damyp, túrlenip, ony qoldanýshylardyń aıasy da kóbeıýde. Sondyqtan da ony qoldanýdyń ádebi men mádenıetin úırený, ony saqtaý, otbasy múshelerimizdi de soǵan tárbıeleý ýaqyt kúttirmeıtin másele. Musylman adam ózge adamdarmen qarym-qatynas jasaǵanda kórkem minez tanytyp, ádep saqtap, taqýalyq qalpyn joǵaltpaı, áleýmettik jelide ózindik ustanymy bolýy qajet. Ardaqty Paıǵambarymyz (oǵan Allanyń salaýaty men sálemi bolsyn):
اتَّقِ اللَّهَ حَيْثُمَا كُنْت ، وَأَتْبِعْ السَّيِّئَةَ الْحَسَنَةَ تَمْحُهَا ، وَخَالِقِ النَّاسَ بِخُلُقٍ حَسَنٍ
«Qaıda bolsań da Alladan qoryq, kúnáli isten keıin ony óshiretin jaqsylyq jasa ári adamdarmen qarym-qatynasta kórkem minezdi bol», – degen (ımam Ahmad, Termızı). Alla Taǵala bizderge taqýalyq pen kórkem minezdi násip etip, qasıetti juma kúngi duǵa-tilekterimizdi qabyl etkeı!» dedi.
Juma namazynan keıin QMDB Tóraǵasy Naýryzbaı qajy Taǵanuly el amandyǵy men ıgiligi úshin duǵa jasady.