QMDB TÓRAǴASY ALMATYDA MÁÝLIT KEShINE QATYSTY (FOTO)
Qazaqstan musylmandary dinı basqarmasynyń uıymdastyrýymen Almatyda «Adaldyq jarshysy – Muhammed (ﷺ)» taqyrybynda rýhanı máýlit keshi ótti.
Adamzattyń ardaqtysy Paıǵambarymyz (oǵan Allanyń salaýaty men sálemi bolsyn) dúnıege kelgen máýlit aıynyń qurmetine ótken rýhanı keshke Bas múftı Naýryzbaı qajy Taǵanuly arnaıy qatysty. QMDB Tóraǵasy jınalǵan kópshilikti múbárak máýlit aıymen quttyqtap, adamdardy Paıǵambarymyz (oǵan Allanyń salaýaty men sálemi bolsyn) nasıhattaǵan adaldyq jolyna, adamgerlishilik pen eńbekqorlyqqa, sondaı-aq Quran Kárimdi qurmetteýge shaqyrdy.
«Ardaqty Paıǵambarymyz Muhammed Mustafa (oǵan Allanyń salaýaty men sálemi bolsyn) búkil ǵumyryn úmbetin kemel de kórkem minez ıesi etip tárbıeleý úshin jumsady. Hadıs sháripte: «Rasynda men kórkem minezdi kemeldendirý úshin jiberildim», – dep aıtqan (ımam Buharı). Alla Elshisiniń (oǵan Allanyń salaýaty men sálemi bolsyn) úlgi etip kórsetken ári úmbetine nasıhat etken mańyzdy qundylyqtardyń biri – adaldyq. Ol – jan-dúnıe tazalyǵyn, aq peıil men shynaıy kóńildi qajet etetin joǵary adamı qasıet. Halqymyzda: «Adaldyq – ardyń isi», «Adaldyq júrgen jerde, adamdyq júredi», «Adal eńbek azdyrmas, Aramdyq boıdy jazdyrmas», – degen danalyq sózder bar.
Bizdiń Memleket basshysy qadirli Qasym-Jomart Kemeluly da óz sózinde: «Adal azamat degenimiz – jaqsy qasıetterge ıe bolyp, adal eńbek etetin jáne tabysqa adal jolmen jetetin adam. Iaǵnı, adaldyq pen ádildikti bárinen bıik qoıady. Ozyq oıly ult bolý úshin búkil qoǵam sana-sezimin ózgertip, jańa qundylyqtardy ornyqtyrýy kerek. Árbir adam «Adal azamat» degen atqa laıyq bolsa, elimizde ádil qoǵam ornaıdy. «Adal adam – Adal eńbek – Adal tabys» – bir-birinen ajyramaıtyn uǵymdar. Osy úsh taǵandy ozyq ári tabysty elge aınalýdyń basty kilti deýge bolady», – degen bolatyn. Alla Taǵala bizderdiń árbir iste adal bolyp, Alla Elshisin (oǵan Allanyń salaýaty men sálemi bolsyn) shynaıy úlgi etken, ıgi jandardan bolýymyzdy jazǵaı!» dedi Bas múftı.
Zııaly qaýym ókilderi, aqsaqaldar men meshit jamaǵaty, ımamdar men qala turǵyndary qatysqan keshte aqyn, sazger Jáken Omarov Paıǵambarymyzdyń (oǵan Allanyń salaýaty men sálemi bolsyn) ómirbaıanynan hıjrettiń 9-10 jyldary, ıaǵnı, Alla elshisiniń qoshtasý qajylyǵyn qazaq tilinde jyrlady. Máýlitke arnalǵan merekelik sharada «Óner qyrandary» teatry sahnalyq qoıylymdar qoıdy. Estrada ánshileri ıláhı ánder men termeler oryndap, Paıǵambarǵa degen saǵynyshtaryn ánmen jetkizdi.
Shara sońynda Máýlit rýhanı keshiniń bıletterinen túsken qarajatty Bas múftı Naýryzbaı qajy Taǵanuly kópshiliktiń aldynda muqtaj kisilerge tabystady. Sonymen qatar kesh qonaqtarynyń Paıǵambarymyzdyń (oǵan Allanyń salaýaty men sálemi bolsyn) ómir jolymen VR tehnologııasy arqyly tanysýyna múmkindik berildi. Almatylyqtar muny erekshe yqylaspen qabyldap, rızashylyǵyn bildirdi.
