QMDB: RANT músheleri test tapsyrdy (FOTO)

Búgin Qazaqstan musylmandary dinı basqarmasynyń Ortalyq apparatynda Respýblıkalyq aqparattyq túsindirý tobyna úmitker belgili din qyzmetkerleri test tapsyrdy.

Elektrondy emtıhan suraqtaryna fıqh, sıra, QR zańdary men zańnamalary, tarıh, t.b. pánder engizilgen. Maqsat – din qyzmetkerleri arasynda saraptama júrgizip, bilim deńgeıin anyqtaý. Bas múftı Serikbaı qajy Oraz test tapsyrý sharasyna arnaıy qatysyp, emtıhan júrgizý barysymen tanysty.

«Biz din qyzmetkerlerin árdaıym jetildirip otyrýymyz kerek. Imamdar tek dinı bilimmen shektelip qalmaýy tıis. RANT tobynyń nátıjeli jumysynyń arqasynda ótken jyly 347 azamat radıkaldy raıynan qaıtty», – dep atap ótti Serikbaı Satybaldyuly.

Aıta keteıik, 2018 jylǵy esep boıynsha RANT quramynda 28 adam qyzmet atqarǵan. Óńirler boıynsha 250-ge jýyq jalpy jáne 150 jeke kezdesýler ótkizgen.

Bıylǵy quramǵa ókil ımamdardyń usynysymen RANT quramy jańadan 30 bilikti mamanmen tolyǵyp otyr. Sondaı-aq, top músheleri jyl saıyn saraptamadan ótip, synaq tapsyryp turatyn bolady. Arnaıy RANT jáne JANT tobyna arnalǵan ádistemelik qural jasaý jumystary da qolǵa alynbaq.