QMDB qyzmetkerleri tótenshe jaǵdaıǵa baılanysty duǵa jasady (FOTO)

Búgin elordada «Aq meshit» meshitinde Bas múftı Naýryzbaı qajy Taǵanuly bastaǵan Qazaqstan musylmandary dinı basqarmasynyń qyzmetkerleri elimizdegi tótenshe jaǵdaıǵa baılanysty Quran oqyp, duǵa jasady.

«Ýa, Alla Taǵala! Elimizdegi jáne álemdegi kúlli musylman úmbetin, barsha adamzat balasyn juqpaly indetten saqtaǵaısyń. Naýqastanǵan jandarǵa shıpańdy bere gór. Meshitterimizdi jamaǵatqa toltyr. Qajylyq qulshylyǵyn jalǵastyrýdy násip et. Osy synaqtan súrinbeı ótýge járdem ber. Juqpaly indetke dýshar bolǵan jandarǵa jar bolǵaısyń. Olarǵa em-dom sharalaryn jasap jatqan azamattardyń jumysyna jeńildik bergeısiń. Ýa, Alla! Elimiz ben jerimizdi túrli tabıǵı apat pen indetten saqtaǵaısyń. Halqymyzǵa amandyq, jurtymyzǵa tynyshtyq násip etkeısiń» – dep duǵa jasady QMDB qyzmetkerleri.

Quran baǵyshtap, duǵa jasaý rásimderinen keıin Bas múftı Naýryzbaı qajy Taǵanuly elimizdegi musylman jamaǵatyn Allaǵa madaq, paıǵambarǵa salaýat aıtyp, tótenshe jaǵdaıǵa baılanysty duǵa jasaýǵa úndedi.