QMDB: Qurannyń jańa aýdarmasy men tápsiri jaryq kórdi (FOTO)
Búgin elordadaǵy QMDB ǵımaratynyń májilis zalynda «Qasıetti Quran: maǵynasy men túsiniktemeleri» atty kitaptyń tusaýkeseri ótti. Tanytym sharasyna Bas múftı Naýryzbaı qajy Taǵanuly, Parlament depýtattary, ǵalymdar, zııaly qaýym ókilderi men din qaıratkerleri qatysty.
Jańa eńbek Quran aıattaryn tikeleı maǵynasynda túsiný, jastardyń destrýktıvti aǵymdar arbaýyna ketpeýine yqpal etý maqsatynda jaryq kórip otyr. Qurandy arab tilinen aýdarǵan – ıslamtanýshy, QMDB naıb múftıi Ershat Ońǵarov. Qazaq tiliniń ádebı mánerimen órnektep, redaktsııalaǵan – Qazaqstan Jazýshylar odaǵynyń múshesi, jazýshy Nurjan Muratalıev.
Tanytym sharasynda Bas múftı Naýryzbaı qajy Taǵanuly Qurannyń adamzatty nadandyqtan, zulymdyqtan týra jolǵa, ilim men órkenıet jolyna bastaıtyn Haq kitap ekenine toqtaldy.
«Quran oqylǵan, oǵan amal etilgen úıde, jerde, elde tynyshtyq ornaıdy, Allanyń bereketi bolady. Budan túıetin oı: Quransyz ómirdiń máni de sáni de joq. Paıǵambarymyzdyń (oǵan Allanyń salaýaty men sálemi bolsyn) hadısinde: «Úılerińizde Quran Kárimdi kóp oqyńyzdar. Sebebi Quran oqylmaǵan úıde jaqsylyq, bereke az bolady. Ondaı úı-ishi árdaıym qıyndyqta bolady. Iaǵnı, ondaı úıde tynyshtyq bolmaıdy», – degen. Mine, qoldaryńyzda Qurannyń jańa aýdarmasy men tápsiri tur. Arab tilinen aýdarǵan – ıslamtanýshy, QMDB naıb múftıi Ershat Ońǵarov. Aýdarmanyń ereksheligi – qasıetti aıattar arab tilindegi túpnusqadan aýdarylǵan, aıattardyń qazaqsha maǵynasy berilgen, tápsiri, túsiniktemesi men tarıhy jan-jaqty jazylǵan. Súreniń qazirgi ǵylymmen baılanysy baıandalǵan, arab tilindegi aıattyń durys oqylý transkrıptsııasy berilgen. Kitap kólemi 1000 betten asady. Aýdarmashy aýdarma barysynda Mysyr, Túrkııa, Arab memleketterindegi túpnusqa qoljazbalarǵa súıene otyryp, din men dástúr sabaqtastyǵyna mán bergen», – dep atap ótti Naýryzbaı qajy Taǵanuly.
Sondaı-aq, Bas múftı Ershat Aǵybaıulynyń bul eńbekti daıyndaýda ál-Matýrıdı, án-Násáfı, ál-Jáláláın, ál-Álýsı syndy hanafı mázhabynyń ǵulama-ǵalymdary men tápsirshilerdiń kitabynan óz nusqasynan aýdaryp shyqqanyn, kitapty daıyndaýda birneshe jylyn sarp etkenin aıryqsha atap ótip, alǵys bildirdi.
