QMDB: QAZAQSTANDYQ QAJYLAR DIN AMAN

Qazaqstan qajylyq mıssııasy qasıetti Mekke jerinde uly saparǵa kelgen otandastarymyzdyń din aman ekenin habarlaıdy.

Mıssııadaǵy dárigerler tobynyń jetekshisi Ardaq Aıtbaıulynyń aıtýynsha, medıtsınalyq ortalyq kómegine 14-16 maýsym kúnderi 703 qajy júgingen. Olardyń qatarynda júrek, qantamyrlary, joǵary jáne tómen tynys jáne asqazan-ishek aýrýlary, sondaı-aq basqa da (mazol jaraqaty, allergııa, konıýnktıvıt, t.b.) syrqat boıynsha 120 qajy eki nemese birneshe ret tekserilgen.

«Budan bólek, 15 maýsymda Muzdalıfada qan qysymy kóterilgen qajyǵa jedel alǵashqy kómek kórsetilip, dárigerdiń baqylaýymen qonaqúıge jóneltildi. Keshe 16 maýsymda Mına jazyǵynda tranzıtorlyq ıshemııalyq ustama boıynsha bir qajyǵa alǵashqy medıtsınalyq kómek kórsetilip, statsıonarǵa jatqyzyldy. Sonymen qatar, búgin Jamaratta shaıtanǵa tas laqtyryp kele jatqan jolda qanty tómendep, esinen tanyp jatqan áıel adamǵa tez arada kómek kórsetilip, ol da statsıonarǵa jetkizildi. Allaǵa shúkir, qazirgi tańda atalǵan naýqastar dárigerlerdiń tolyq baqylaýynda, jaǵdaılary birqalypty. Odan bólek, elimizden ákelingen dári-dármek qory da jetkilikti. Biz úshin árbir qajynyń densaýlyǵy mańyzdy» deıdi Ardaq Aıtbaıuly.

Aıta keteıik, birer saǵat buryn aqparat quraldarynda Mekkedegi aptap ystyqtan birneshe adamnyń qaza tapqany týraly habarlanǵan edi. Osy oraıda Qazaqstan qajylarynyń arasynda qaıtys bolǵan eshkim joq ekenin taǵy da málimdeımiz. Sondaı-aq Qazaqstan qajylyq mıssııasynyń quramynda 4 dáriger jáne 16 týroperatordyń árqaısynda 1 dárigerden, barlyǵy 20 bilikti medıtsına mamany em-shara jumystarymen aınalysýda.

​