QMDB meshit salýdyń arnaıy erejesin bekitti (FOTO)

Qazaqstan musylmandary dinı basqarmasy meshit salýdyń arnaıy erejesin bekitti. Bul týraly Bas múftı Serikbaı qajy Oraz Astanada ótken alqaly májiliste málimdedi.

QMDB Ǵulamalar Keńesi bekitken qujat «Qazaqstan Respýblıkasynda tıptik jobadaǵy meshit ǵımaratyn salýdyń tártip erejesi» dep atalady.

Bul – elimiz boıynsha tıptik jobadaǵy meshit ǵımaratyn salýdyń tártibin qalyptastyratyn negizgi qujat. Ereje QR «Dinı qyzmet jáne dinı birlestikter týraly» Zańyna, «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» QR Zańyna, ózge de normatıvtik quqyqtyq aktilerge, sonymen qatar QMDB Jarǵysyna sáıkes ázirlendi.

Budan bylaı meshit ǵımaraty jergilikti jamaǵattyń sanyna oraı 3 deńgeıde salynady: aýyldyq (syıymdylyǵy 70-500 adam), aýdandyq (syıymdylyǵy 500-1500 adam), oblystyq, qalalyq (syıymdylyǵy 1000-5000 adam).  

Qujatqa sáıkes, bolashaqta jańadan salynatyn meshittiń qurylysy zamanaýı talapqa saı júrgizilýi tıis. Demek, Alla úıin turǵyzýǵa sheshim qabyldaǵan adam ǵımarattyń kórikti bolýyna kóńil bólýi shart. Meshit salýda zamanaýı ozyq úlgilerdi, Islamnyń jáne jergilikti sáýlet ónerin paıdalaný mindetti. Meshittiń munarasy, kúmbezi jáne ishki-syrtqy bezendirilýi jergilikti dástúrge saı bolýy tıis.

Sonymen qatar, QMDB qabyldaǵan qujat boıynsha, endi meshit jergilikti jamaǵattyń sanyna laıyqtap salynatyn bolady. Buǵan qosa meshit aýlasyna avtoturaq, saıabaq, t.b. qajetti nysandar turǵyzylmaq. Meshit qurylysyna sapaly jáne uzaq merzimge jaraıtyn materıaldardy paıdalaný talap etiledi. Qaýipsizdik sharalaryn saqtaý maqsatynda arnaıy qurylǵylar da ornatylady. 

Aıta keter jaıt, 2018 jyly elimiz boıynsha 38 meshit paıdalanýǵa berildi. Búginde respýblıka boıynsha 2 626 meshit halyqqa qyzmet etýde.