QMDB «Halal damý» men Ulttyq saraptama ortalyǵy memorandýmǵa qol qoıdy (FOTO)

Búgin Qazaqstan musylmandarynyń bas ordasynda QMDB tóraǵasynyń orynbasary, naıb múftı B.Esmahannyń tóraǵalyǵymen Ulttyq saraptaý ortalyǵy mamandarynyń qatysýymen halal ındýstrııasyn damytýǵa, laboratorııalyq jumystardy jandandyrýǵa arnalǵan alqaly májilis bolyp ótti.

Resmı kezdesýge  QMDB halal ónimderin standarttaý bóliminiń meńgerýshisi B.Myrzageldıev, «Halal Damý» JShS-ń dırektory A.Eljanov jáne QR Densaýlyq saqtaý mınıstrliginiń Qoǵamdyq densaýlyq saqtaý komıtetiniń «Ulttyq saraptama ortalyǵy» ShJQ RMK bas dırektory K.O.Balykbaev, USO Ekspertıza boıynsha mamandary: Ý.B.Ashırbaev, N.R.Salamatov, USO baspasóz hatshysy A.Sýraganova qatysty.

Basqosýda múftııat pen Ulttyq saraptama ortalyǵynyń birlesken jobalaryn júzege asyrý, ózara tájirıbe almasý, azyq-túlik qaýipsizdigin qamtamasyz etý, halal ónimderge laboratorııalyq  saraptama júrgizýdi arttyrý, osy salada Dinı basqarma men Ortalyqtyń ortaq qyzmetin jandandyrý, t.b. máseleler jan-jaqty sóz boldy.

Talaı jyldar boıy Almaty qalasynda ornalasqan «Treegene» molekýlalyq-genetıkalyq zerthanasy men «KazNIVI» Qazaq ǵylymı-zertteý veterınarııa ınstıtýty zerthanasymen tyǵyz baılanysta jumystar atqaryp kelgen «Halal Damý» JShS búgin Astana qalasyndaǵy negizgi ortalyq apparatynan jáne 20 fılıaldan quralatyn QR Densaýlyq saqtaý mınıstrliginiń Qoǵamdyq densaýlyq saqtaý komıtetiniń «Ulttyq saraptama ortalyǵymen» ózara yntymaqtastyq týraly kelisimge qol qoıdy. Budan bylaı «Halal Damý» JShS-ń laboratorııalyq jumystary 14 oblystyq jáne Almaty jáne Astana qalalary boıynsha júrgiziletin bolady.