QMDB: Kaırdegi Islam ǵylymı ortalyǵymen ortaq jobalar júzege asady (FOTO)

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Mysyr Arab Respýblıkasyna jasaǵan saparynda ál-Azhar ýnıversıteti janyndaǵy Islam ǵylymı zertteý ortalyǵynyń dırektory Nazır Muhammed Iıadpen kezdesti.

Kezdesýde Qazaqstan musylmandary dinı basqarmasy men ál-Azhar ýnıversıteti janyndaǵy Islam ǵylymı zertteý ortalyǵy arasynda yntymaqtastyqty arttyrý máselesi talqylandy.

Bas múftı Qazaqstanda salynatyn Islam akademııasy men Islam jáne teologııa kitaphanasyn klassıkalyq baǵyttaǵy kitaptarmen qamtamasyz etýge aıryqsha toqtaldy. Osy bastama boıynsha ortaq ıgi jobalardy júzege asyrýdy usyndy.

«Ál-Azhar ýnıversıtetiniń san ǵasyrlyq tarıhy men qalyptasqan tájirıbesi bar. Biz siz basqaratyn ál-Azhar ýnıversıteti janyndaǵy Islam ǵylymı zertteý ortalyǵymen áriptestik baılanysty arttyrýǵa daıynbyz. Aldaǵy ýaqytta ekijaqty tájirıbe almasý is-sharalaryn ótkizýdi usynamyn. Bul asyl dinimizdi ǵylymı turǵydan nasıhattaýǵa serpin beredi» dedi Naýryzbaı qajy Taǵanuly.

Óz kezeginde atalǵan ortalyq dırektory Nazır Muhammad Iıad áriptestik baılanys ornatý jaıly oń nıetin bildirip, Islamdy ǵylymı turǵydan nasıhattaýdyń mańyzdy ekenin jetkizdi.

​