QMDB: Forým úndeýi jarııalandy (FOTO)
Búgin Elordada ótken III respýblıkalyq ımamdar forým sońynda jıynǵa qatysýshylardyń Úndeýi jarııalandy. Úndeý mátinin QMDB Apparat basshysy Ǵylymbek Jádigeruly oqyp berdi. Úndeý mátini tómendegideı:
«Biz, din, memleket jáne qoǵam qaıratkerleri, «Rýhanı qundylyqtar – qoǵam birliginiń negizi» atty III respýblıkalyq ımamdar forýmyna qatysýshylar «Qazaqstan musylmandary Rýhanı Tuǵyrnamasy» qujatyn qoldaı otyryp, halyqty ımandylyqqa, otanshyldyqqa, jan-jaqty bilim alýǵa, eńbekqorlyqqa, aýyzbirshilikke, ádildikke úndeımiz.
Imandylyq – adamnyń amalyn kórkemdeıtin rýhanı jol. Ol – adam boıyndaǵy izgiliktiń kórinisi. «Otandy súıý – ımannan» degen ataly sóz bar. Otanshyldyq – Otanǵa, týǵan eline, onyń tiline, týyp ósken jerine, salt-dástúri men mádenıetine degen qurmetten bastaý alady. Otanshyldyqtyń máıegi – ultty súıý. Barsha azamatty elimizdiń ıgiligi úshin adal qyzmet etýge shaqyramyz.
Bilim alý, saýat ashý – Islam dininiń eń basty talaby. Paıǵambarymyz (oǵan Allanyń salaýaty men sálemi bolsyn): «Bilim alý – árbir musylmanǵa (er men áıelge) paryz», – degen. Memleketti quraýshy azamattardy básekege qabiletti bolý úshin úzdiksiz damyp, árdaıym ózin jetildirip otyrýǵa úndeımiz.
Otanǵa qyzmet etip, bilim alý, ózin-ózi damytý turaqtylyqtyń negizinde júzege asady. Bolashaǵymyzdyń jarqyn bolýy búgingi birligimizge tikeleı baılanysty.
Sharıǵatta ǵıbadat istermen qatar adal kásip, otbasy, qoǵam aldyndaǵy jaýapkershilik sekildi dúnıe isteri birge júredi. Óıtkeni, Islam – dúnıe men aqyret tizginin teń ustaǵan din. Biz Qazaqstan musylmandaryn dúnıe isi men qulshylyq-ǵıbadatty qustyń qos qanatyndaı teń ustaýǵa úndeımiz.
Qoǵamdyq ortada mádenıetti bolý, ózin ustaı bilý, úlkenderdi syılaý, olarǵa qurmet kórsetý, sálemdesý, sypaıylyq tanytý – rýhanı baılyqtyń kórinisi. Barsha azamatty mádenıetti bolýǵa shaqyramyz.
Al ádildik – izgiliktiń ózegi. Ádildik joq jerde bereke bolmaıdy. Alla Taǵala árbir jaratylysty óz ólshemimen ádil jaratqan. Qoǵamda jamandyqtyń jolyn bógeıtin kúsh ol – ádildik. Ádildiktiń saltanat qurýymen ǵana qoǵam órkendeıdi. Ár adamdy ádildikti óz ómirinen bastap, odan keıin ony otbasylyq, qoǵamdyq deńgeıge kóterýge úndeımiz».
Forýmǵa memleket, qoǵam jáne din qaıratkerleri, QMDB Ǵulamalar keńesiniń músheleri, teolog-ǵalymdar jáne Dinı basqarmanyń 500 ımamy qatysty.
Nur-Sultan qalasy
23-qazan, 2019 jyl
