QMDB: Bir aıda onlaın rejımde 485 dinı ýaǵyz aıtyldy (FOTO)
Elimizde juqpaly indet taralǵaly beri ýaǵyz-nasıhat jumystary da onlaın rejımge kóshken bolatyn.
Áý basta bul ımamdarǵa da jamaǵatqa da qolaısyz kóringenimen ýaqyt óte bul baǵyttyń tıimdiligi artyp keledi. QMDB Ýaǵyz-nasıhat bóliminiń meńgerýshisi Batyrjan Mansurovtyń aıtýynsha, keshendi jumystyń nátıjesinde tek ókildikterge tıesili áleýmettik jelilerde kyrkúıek aıynyń qorytyndysy boıynsha 485 dinı ýaǵyz ben suhbat júrgizilip, barlyǵy 1 973 950 qaralymǵa ıe boldy.
«Kúndelikti dinı dáristerden bólek dinı suhbattardy júıeli túrde júzege asyrý, ony retke keltirý mańyzdy baǵyttardyń biri boldy. Atap aıtqanda, osy jyldyń qyrkúıek aıynan bastap, aptasyna bir márte elimizdegi ár óńirdiń resmı paraqshasynan «Ýaǵyz-nasıhat» bólimi bekitilgen ýaqytqa saı QMDB basshylyq quramynan bastap, ǵulamalar keńesi músheleri, Nur-Múbárak ýnıversıteti jáne medrese-kolledj ustazdary, oblys jáne qala bas ımamdary, RANT, JANT múshelerinen suhbat alý júıeli túrde iske asyp keledi» deıdi Batyrjan Berdenuly.
Budan bólek, QMDB tóraǵasy, Bas múftı Naýryzbaı qajy Taǵanulynan bastap, naıb múftı jáne bólim basshylary men mamandardyń dáristeri, RANT músheleriniń qazaq-orys tilindegi ýaǵyz-nasıhattary Mýftııat jáne Hıkmet stýdııasy ıýtýb arnalary arqyly jáne ınstagram paraqshalarynda tikeleı Efırde ótip júr.
Orys tildi jamaǵattyń rýhanı qajettilikterin eskere otyryp, orys tildi mamandar onlaın rejımde aptasyna bes ret tikeleı Efırde Hikmet.tv ınstagram paraqshasy arqyly arnaıy bekitilgen oqýlyqtarmen dinı dárister júıeli túrde júrgizip keledi.
