QMDB: Barlyq meshitte duǵa jasalady

Qazaqstan musylmandary dinı basqarmasynyń tóraǵasy Serikbaı qajy Oraz Almaty oblysynda bolǵan qaıǵyly oqıǵaǵa baılanysty qasıetti juma namazynan keıin jamaǵatpen duǵa jasaýdy tapsyrdy.

Musylmannyń ózge musylmannyń aldynda mindetteri bar. Sonyń biri – musylman baýyry úshin duǵa jasaý, jaqsylyq tileý. Apattan aman qalǵandar úshin shıpa suraý, al marqum bolǵandarǵa Alladan meıirim, keshirim tileý – musylmannyń mindeti. 

Biz de qasıetti juma kúni apattan jaraqat alǵan barsha baýyrlarymyzǵa shıpa suraımyz, marqum bolǵandardyń artynda qalǵan otbasylarǵa qaıǵylaryna ortaqtasyp kóńil aıtamyz.

Aıta ketsek, búgin tańda Almatydan Nur-Sultanǵa baǵyt alǵan «Bek Eır» áýe kompanııasynyń №Z2100 reısi ushý kezinde apatqa ushyrady. Bolǵan oqıǵaǵa baılanysty Bas múftı ushaq apatynan qaza bolǵan azamattardyń otbasyna kóńil aıtty.