QMDB-30: Almaty qalasy ákimi mereıtoıymen quttyqtady

Almaty qalasynyń ákimi Baqytjan Saǵyntaev QMDB Tóraǵasy, Bas múftı Serikbaı qajy Orazǵa Dinı basqarmanyń 30 jyldyǵyna oraı quttyqtaý hat joldady.

«El ıgiligi jolynda keleli ister atqaryp júrgen Dinı basqarma osydan 30 jyl buryn táýelsizdigimizdiń altyn besigi Almatyda qurylǵan edi. Elimizdegi barsha musylman qaýymynyń rýhanı ordasy bolyp tabylatyn basqarmanyń qalyptasyp, kemeldenýi men damýy arý qalamyzben tikeleı baılanysty» degen qala ákimi QMDB-nyń elordaǵa aýysyp, búginde musylman qaýymnyń qara shańyraǵyna aınalǵanyn atap ótti.

Sondaı-aq Baqytjan Ábdiruly «Jurtshylyqty jaqsylyqqa úndep, elimizdiń musylman jamaǵatynyń yntymaq-birligin saqtaýda, dástúrli rýhanı qundylyqty dáripteýde, memlekettik-konfessııaaralyq qatynastardy kúsheıtýde, óskeleń urpaqty teris dinı aǵymdar yqpalynan saqtaý maqsatyndaǵy aǵartýshylyq qyzmetterde Dinı basqarmanyń úlesi orasan zor» deı kele, basqarmanyń rýhanı qyzmetine tabys tiledi.