«Qajylyq qory»: 103 ımamǵa qarajat aýdaryldy

Jýyrda Astanada Bas múftı Serikbaı qajy Orazdyń tóraǵalyǵymen ótken kezekti hattamalyq jınalysta din qyzmetkerlerin áleýmettik qoldaý, olardy jalaqymen qamtamasyz etý máselesi talqylanǵan bolatyn.

Jınalysta «Qajylyq qory» esebinen ózin-ózi qarajatpen qamtamasyz ete almaıtyn aýyl ımamdaryna 50 myń teńge kóleminde jalaqy berý týraly másele kóterildi. Búgin Bas múftı Serikbaı Satybaldyulynyń sheshimimen 103 ımamǵa tıisti qarajat aýdaryldy.  

«Elimiz boıynsha 2058 aýyldyq meshit bar. Onyń basym bóligi ózin-ózi qarajatpen qamtamasyz ete almaıtyn meshitter. Aýylda aılyqsyz qyzmet etetin din qyzmetkerlerin tolyqtaı jalaqymen qamtamasyz etý josparymyzda bar. Alǵashqy kezeń boıynsha búgin 103 aýyl ımamyna «Qajylyq qory» esebinen 50 myń teńge qarajat aýdaryldy. Osylaısha, ımamdardyń áleýmettik máselesin kezeń-kezeńimen sheshýdi kózdep otyrmyz», – dep atap ótti QMDB Tóraǵasy Serikbaı qajy Oraz.

Elimiz boıynsha, 2626 meshitte 6189 adam qyzmet etedi. Onyń 4 myńǵa jýyǵy – din qyzmetkeri. Jalpy din qyzmetkerleriniń 30 paıyzy ǵana tolyqqandy jalaqymen qamtamasyz etilgen.