Qajylyq mıssııa músheleriniń alǵashqy otyrysy ótti (FOTO)

QMDB qajylyq jáne umraǵa baılanysty jumystardy úzdiksiz júrgizip keledi. Bes paryzdyń birin óteý jaqyndaǵan saıyn tirlik te qyza bastaıdy. Bul joly bıylǵy «Qajylyq-2019 maýsymyna» baılanysty alǵashqy alqaly otyrys ótti.

Jıyn barysynda QMDB Apparat basshysy Ǵylymbek Májıev qajylyqtyń mánine toqtalyp, aldaǵy saparǵa saraptama jasady. Onyń ishinde 4 baǵytqa erekshe toqtaldy. Ol uıymdastyrýshylyq, ýaǵyz-nasıhat, aqparat jáne dárigerlerdiń jumysy. Elimizden qajylardy aparatyn 18 kompanııanyń dárigerine basshylyq jasap, jumysyn retke keltiretin quram anyqtaldy. Óıtkeni elden baratyn 3200 qajynyń densaýlyǵyna qaraý aq halattylarǵa júkteletini ras.

Odan bólek QMDB janyndaǵy «Hıkmet» teleradıostýdııasy da Mekke jáne Medına qalalarynan aqparat taratady. Dóńgelek ústel barysynda aqparat tobyna tıisti tapsyrmalar berildi. Sondaı-aq ýaǵyz-nasıhat jáne pátýa berý mamandary mıssııanyń múshesi bolyp kirdi. Oǵan da sebep joq emes. Túrli dárejedegi qajylarymyzdan keletin saýaldarǵa pátýa bóliminiń mamandary jaýap beredi.

Al atalǵan jumystardyń barlyǵyn bir arnaǵa toǵystyrýshy QMDB-ǵa qarasty Qajylyq bólimi ekenin aıta ketkimiz keledi.