Qajylyq-2019: Esep berilip, jospar bekitildi (FOTO)

Búgin Elordada naıb múftı Ershat qajy Aǵybaıulynyń tóraǵalyǵymen qajylyq jumysyna qatysty alqaly jıyn ótti.

Májiliske QMDB Apparat basshysy Ǵylymbek Májıev, Din isteri komıtetiniń basqarma basshysy Dosymjan Nurbaev, Bas múftı keńesshisi Baltabaı Mekejanov, QMDB Qajylyq bóliminiń basshysy Jándilla Bekjigitov jáne qajylyq fırmalardyń jetekshileri qatysty.

Jınalysty ashqan naıb múftı Ershat qajy Aǵybaıuly: «Qajylyq – uly sapar bolsa, qajylarǵa qyzmet etý – úlken saýap. Adam balasy shynaıy nıetpen qarajat jınap, qajylyqqa barady. Al olarǵa laıyqty deńgeıde jol kórsetip, nasıhat aıtyp, qyzmet etý – qurmetti, abyroıly is. Sondyqtan, QMDB qajylyq fırmalardyń jumysyna udaıy monıtorıng jasap, qadaǵalap otyrady», – dedi.

Óz kezeginde sóz alǵan Din isteri komıtetiniń basqarma basshysy Dosymjan Nurbaev qajylyq maýsymy kezinde memleket tarapynan birqatar ıgi sharalar atqarylǵanyn, bul baǵyttaǵy jumystar aldaǵy ýaqytta da jalǵasa beretinin jetkizdi.

QMDB Apparat basshysy Ǵylymbek Májıev Qazaqstan Qajylyq mıssııasynyń bıylǵy jyly atqarǵan jumystary jaıly baıandap, týrfırma tarapynan ketken keıbir kemshilikterdi atap ótti. Sondaı-aq, Qajylyq komıssııasynyń «óte jaqsy», «jaqsy», «ortasha», «tómen» baǵalaý kórsetkishin alǵan fırmalardyń atyn atap, dırektorlaryna tıisti eskertpeler berdi.

Basqosý sońynda qajylyq baǵasyn tómendetý tetikteri men joldary keńinen talqylandy.

​