Qazaqstandyq jas qarı halyqaralyq «Altyn belgi» jeńimpazy atandy (FOTO)

VI Respýblıkalyq Quran saıysynyń 1 oryn ıegeri atanyp, qazaq dalasyna 14 jasynda-aq aty shyqqan jas qarı  Jambyl oblysynyń týmasy Dýlat Qalyǵulov qazaq eliniń týyn asqaqtatyp, álem elderiniń ishinde basty júldege ıe boldy. 

Ol Túrkııa memleketinde ótken Halyqaralyq Quran saıysynda «Altyn belgi» ıegeri atandy. Atalǵan júırikter dodasyna Mysyr, Sırııa, Bahreın, Saýd Arabııasy, Iemen, Indonezııa, Malaızııa syndy alpaýyt memleketterden kelgen 630 úmitker qatysty.

«Altyn belgini» qanjyǵaǵa baılaýdyń sharttary da ońaı bolǵan joq. Bilikti Quran mamandarynyń aldynda 12 túrli suraqqa jaýap berip, Allanyń Kálámin kez kelgen jerinen múdirmeı oqyp, ol aıattyń tarıhyna deıin bilý kerek-ti. Synnan súrinbeı ótip, naqty tolyq 100 upaıdy jınaǵan qatysýshylar ǵana osy ataqqa ilinbek. Mine, dál osy «Altyn belgini" 630 qatysýshynyń arasynan 10 bala ıelense, sonyń birinshisi bolyp bizdiń Dýlat tur. Odan keıingi oryndarda arab elinen kelgen qarılar. Jas qazaqstandyq barlyq qatarlastaryn basyp ozyp, arabtarmen teketiresip, ata-anasynyń, kúlli qazaq dalasynyń úmitin aqtady. 

Atalǵan qurmet gramotasyn Túrkııa eliniń mınıstri tabystap, jyly lebizin bildirdi. Sonymen qatar, jeńimpazdardyń ishinen Dýlat Qalyǵulov osy respýblıkadaǵy «Hilaliye erkek Kur'an Kursu» ýnıversıtetiniń ashylý saltanatyna arnaıy shaqyryldy. 

Osyndaı aıtýly jeńisiniń qurmetine oblystyq «Hıbatýlla Tarazı» meshitinde qasıetti juma kúni jas qarıge qurmet kórsetildi. Taraz qalalyq «Keńeshan qajy» meshitiniń bas ımamy Ǵazız Ahmetov jamaǵat aldynda Dýlattyń erligin tilge tıek etip, «Altyn belgisimen» quttyqtady. Kópshilik shyn júrekten qýanyshyn jetkizip, osyndaı bilimdi qarılardyń kóp bolýyn tilep, bata berdi. 

Aıta ketý kerek, «Altyn belgi» áleýmettik statýsqa ıe, Quran jattaýshynyń deńgeıin bildiretin qujat.