Qazaqstandyq qajylarǵa QMDB atynan dastarhan jaıyldy (VIDEO+FOTO)

Búgin qazaqstandyq qajylarǵa Dinı basqarma atynan dastarhan jaıylyp, qurmet kórsetildi. Bir mezette 200 adam astan dám tatyp, rýhanı keshtiń kýási boldy. Jyldaǵy dástúrge saı jıyn Quran oqýmen bastalyp, bilikti ustazdar kelgen jamaǵatqa ýaǵyz aıtty. Jasy 95-ke taıaǵan Maqulbek aqsaqal kópshilikke batasyn berdi. Aıtýly asqa Jıdda qalasyndaǵy (Saýd Arabııasy Koroldigi) Konsýldyǵynyń basshysy Shaldanbaı Talǵat Rahymqululy men Ózbekstan eliniń mýftııat ókilderi, elimizden kelgen dintanýshy ǵalymdar, qajylyq fırmalarynyń basshylary qatysty.

Alǵash bop sóz alǵan QMDB tóraǵasynyń orynbasary, naıb múftı Alaý Ádilbaev jıylǵan kópke alǵysyn aıtyp, QMDB tóraǵasy, Bas múftı haziret Serikbaı qajy Orazdyń sálemin jetkizdi. Ortaǵa shyǵyp sóz alǵan QMDB Sharıǵat jáne pátýa bóliminiń meńgerýshisi Sansyzbaı Qurbanuly qajylyqtyń mán mańyzyna toqtaldy.

Ózbekstan Bas múftıiniń keńesshisi Nýrıddın Halıqnazarov óz kezeginde aıtýly asqa arnaıy shaqyryp, iltıpat kórsetken qazaq eline, QMDB ujymyna alǵysyn bildirdi. 

Sondaı-aq din qaıratkerleri musylman áleminiń tynyshtyǵy men qazaq eliniń birligi úshin duǵa etti. Qajylarǵa jaıylǵan dastarhan sońynan «Syılyq berińder, bir-birińe degen syılastyqtaryń artady» degen Paıǵambarymyzdyń hadısine saı Dinı Basqarma atynan ázirlengen syı-sııapattar úlestirildi.