Qazaqstandyq bitimgerler Lıvanda tolyq jaýyngerlik ázirlikke keltirildi

Qazaqstandyq bitimgerler Lıvanda tolyq jaýyngerlik ázirlikke keltirildi, dep habarlaıdy QR Qorǵanys mınıstrliginiń baspasóz qyzmeti.

«Bıyl 1 qyrkúıekte Izraıl áskeri Lıvan aýmaǵynan oq jaýdyrýyna qarsy jaýap retinde Marý Ar-Ras, Aıtarýn, Iarýn (Lıvan) eldi mekenderiniń shet jaǵyna áýeden jáne artıllerııalyq shabýyl jasady. BUU jasaǵy mindettemelerge sáıkes tapsyrmalardy oryndaý úshin tolyq jaýyngerlik ázirlikte turdy. Qazirgi ýaqytta eshqandaı qaýip joq. QR Qarýly Kúshteri áskerı qyzmetshileri tarapynan eshkim zardap shekpegen. Jaǵdaı birqalypty. Brondalǵan kóliktermen patrýldeý júrgizilip jatyr», delingen habarlamada.

Eske salaıyq, Lıvandaǵy BUU Qarýly kúshteri mıssııasy quramynda Qazaqstan Qarýly kúshteri ekinshi qurama bitimgerlik rotasynyń áskerı  qyzmetshileri bar.